ادارہ تعلیم کی احتیاطی تدابیر، فلو میں مبتلا طلبا سکول نہ آئیں

موسمی تبدیلی کے حوالے سے تعلیمی اداروں کی انتظامیہ نے والدین کو ہدایت کی ہے کہ اگر ان کے بچوں میں ’فلو‘ کی علامات ظاہر ہوں تو سکول نہ بھیجیں۔

سببق نیوز کے مطابق وزارت صحت کی جانب سے جاری ہدایات پرعمل کرتے ہوئے مملکت کے تعلیمی اداروں نے والدین کو احتیاطی تدابیر اختیار کرنے کی ہدایت کی ہے۔

وزارت صحت کا کہنا تھا کہ امسال انفلوئنزا کے سیزن کا آغاز جلد ہو گیا ہے جس کی وجہ سے سکولوں میں بیشتر طلبا اس کا شکار ہوسکتے ہیں۔

قبل ازیں وزارت میں امورِ صحت کے سیکرٹری ڈاکٹر عبداللہ عسیری نے انکشاف کیا تھا کہ سال رفتہ کے مقابلے میں امسال سیزنل فلو وائرس کا آغاز جلد ہو گیا ہے ۔

ڈاکٹر عسیری نے اس بات کی بھی یقین دہانی کی کہ مملکت میں کسی قسم کا نیا وائرس نہیں صرف نارمل سیزنل فلو ہے جس میں احتیاطی تدابیر پرعمل کیا جائے ۔

عسیری نے مزید کہا کہ سیزنل فلو میں جسم کا درجہ حرارت بڑھ جاتا ہے جبکہ ہڈیوں اور جوڑوں میں درد کی شکایت ہوتی ہے۔ فلو کا شکار عام طور پر بچے، چھوٹی جماعتوں کے طلبا اور بڑی عمر کے افراد ہوسکتے ہیں۔

ویکسین کے حوالے سے ڈاکٹر عسیری کا کہنا تھا کہ مملکت کے تمام ہسپتالوں اور طبی مراکز میں فلو ویکسین کے انتظامات موجود ہیں لوگوں کو چاہئے کہ دسمبر کے آغاز سے قبل ہی ویکسینیشن کرالیں تاکہ فلو وائرس کے حملے سے محفوظ رہا جاسکے۔