سعودی پروجیکٹ: ایک ہفتے میں یمن سے مزید 875 دھماکہ خیز ڈیوائسز تلف

سعودی عرب کے مسام پروجیکٹ کے ارکان نے گزشتہ ہفتے کے دوران یمن کے مختلف علاقوں سے مزید 875 بارودی سرنگوں اور دھماکہ خیز ڈیوائسز کو ہٹایا ہے۔

عرب نیوز کے مطابق ان میں 498 پھٹنے سے رہ جانے والا آرڈیننس، 367 اینٹی ٹینک، 7 اینٹی پرسنل بارودی سرنگیں اور 3 دھماکہ خیز ڈیوائس شامل ہیں۔

مارب، عدن، الجوف، شبوہ، تعز، الحدیدہ، لحج، صنعا، البیضا، الضالع اور صعدہ میں بارودی سرنگیں ہٹانے کی کارروائیاں کی گئی ہیں۔

مسام کے منیجنگ ڈائریکٹر اسامہ القصبی نے بتایا’ 2018 میں پروجیکٹ کے آغاز کے بعد سے اب تک 5 لاکھ 25 ہزار499 بارودی سرنگوں کو تلف کیا جا چکا ہے۔‘

دھماکہ خیز مواد اور بارودی سرنگوں کو بلا تفریق زمین میں بچھایا گیا تھا جو عام لوگوں، خاص طور پر بچوں، خواتین اور عمر رسیدہ افراد کے لیے سنگین خطرہ بن رہا تھا۔

مسام پروجیکٹ کے تحت باردوی سرنگیں صاف کرنے والے مقامی انجینیئروں کی تربیت کی جاتی ہے اور انھیں آلات فراہم کیے جاتے ہیں اور جو یمنی دھماکہ خیز مواد کی وجہ سے زخمی ہو جاتے ہیں، یہ پروجیکٹ انھیں مدد بھی دیتا ہے۔

پروجیکٹ کے تحت مختلف ٹیموں کو دیہات، سڑکوں اور سکولوں سے بارودی سرنگوں یا دھماکہ خیز مواد کو ہٹانے کا کام سونپا جاتا ہے تاکہ عام لوگ محفوظ رہتے ہوئے نقل و حرکت کر سکیں۔ انسانی بنیادوں کے تحت امداد عام لوگوں تک پہنچ سکے۔