سعودی عرب میں 70 سالہ خاتون نے قرآن کریم حفظ کرلیا
دو دہائیوں کا وقت لگا بالاخر وہ اپنے مقصد میں کامیاب ہو گئیں (فوٹو: سبق)
سعودی عرب کے الباحہ ریجن میں 70 سالہ خاتون ’حمدہ الغامدی‘ نے قرآن کریم حفظ کرلیا ۔ فلاحی تنظیم برائے تحفیظ قرآن ’ترتیل‘ کے زیر انتظام علاقائی ’حلقہ تحفیظ قران‘ کی نگرانی میں حفظ مکمل کیا۔
اخبار 24 کے مطابق معمر خاتون کو قرآن حفظ کرنے کا شوق تھا مگر گھریلو مصروفیات اور بڑھتی عمر صحت کے چیلنجز اور دیگر امور کی وجہ سے انہیں دو دہائیوں کا وقت لگا بالاخر وہ اپنے مقصد میں کامیاب ہو گئیں۔
علاقائی حلقہ تحفیظ نے معمرحافظہ کے اعزاز میں تقریب منعقد کی جو دراصل ایک پیغام بھی تھا کہ قرآن کریم زندگی کا نور ہے اور جو بھی اسے حقیقی طور پر اپناتا ہے اس کےلیے راہیں آسان اور مرحلہ بخوبی طے ہو جاتے ہیں خواہ عمر کا کوئی بھی مرحلہ کیوں نہ ہو۔
سعودی خاتون کو حفظ کی تعلیم دینے والی معلمہ کا کہنا تھا ’حافظہحمدہ الغامدی حقیقی معنوں میں ایک مثال ہیں۔ وہ باقاعدگی سے مدرسے آتی تھیں، لگن اور شوق کی انتہا تھی کہ اس عمر میں انہوں نے اپنے ارادے اور پختہ عزم سے کتاب اللہ کو حفظ کیا اور ایک مثال قائم کی۔‘
فلاحی تنظیم ترتیل کے بورڈ آف ڈائریکٹر کے چیئرمین علی آل سرور اور دیگر ارکان نے بھی معمر خاتون کے جذبے اور لگن کی تعریف کی۔
تنظیم نے معمرحافظہ کے اعزاز میں خصوصی تقریب کا بھی انعقاد کیا۔
