جدہ تاریخیہ میں دکان جہاں ایک صدی پرانی اشیا موجود ہیں

جدہ کے قدیم تاریخی علاقے کی ایک تنگ سی گلی میں سعودی شہری عادل زھران نے سعودی فضائی کمپنی السعودیہ سے ریٹائرمنٹ کے بعد اپنی زندگی کو مصروف رکھنے کے لیے قدیم اشیا کو جمع کرکے میوزیم اور پرانی اشیا کی دکان قائم کرلی۔

اخبار 24 سے گفتگو کرتے ہوئے عادل زھران نے بتایا کہ انہیں قدیم اشیا کو جمع کرنے کا شوق 40 برس قبل ہوا۔

’مجھے ایک پرانا ٹیلی فون ملا جو ہینڈل سے چلتا تھا۔ اسی کوشش میں رہتا کہ کہیں سے کوئی پرانی چیز ملے تو اسے حاصل کر لوں۔‘

عادل زھران جدہ کے قدیم تاریخی علاقے البلد کی مشہور محلہ ’الشام‘ میں پیدا ہوئے اور وہاں زندگی گزاری۔ بلد کے اسی علاقے میں ایک تنگ سی دکان میں انہوں نے قدیم اشیا کا ذخیرہ اکھٹا کیا ہوا ہے۔

ان کا کہنا ہے کہ ’دکان میں موجود بعض چیزیں 130 برس سے بھی زیادہ پرانی ہیں۔ ہر چیز اپنے اندر ایک وسیع تاریخ رکھتی ہے۔‘

میوزیم طرز کی دکان میں عہدِ قدیم میں حجاج کے زیر استعمال رہنے والے برتن شامل ہیں جو ایک صدی سے بھی زیادہ پرانے ہیں، یہ بیرون ملک سے آنے والے حجاج اپنے استعمال کے لیے لایا کرتے تھے۔

دکان میں پرانی گھڑیاں، کیمرے، سینما پروجیکٹر اور قدیم و نادر رسالے اور پرانے ٹیلی فون کے علاوہ بہت کچھ ہے جو نادر چیزیں جمع کرنے والے شوقین افراد کے لیے ایک مثالی مقام ہو سکتا ہے۔