مدینہ منورہ: ’ ریاض الجنہ‘ میں نوافل کی ادائیگی اور زیارت ’روضہ ‘ کے نئے اوقات
مدینہ منورہ: ’ ریاض الجنہ‘ میں نوافل کی ادائیگی اور زیارت ’روضہ ‘ کے نئے اوقات
جمعہ 5 دسمبر 2025 19:06
’ریاض الجنہ ‘ کے لیے پرمٹ سال میں ایک بار جاری ہوگا(فوٹو، ایس پی اے)
ادارہ امور حرمین شریفین نے مسجد نبوی الشریف میں روضہ رسول ﷺ کی زیارت اور ریاض الجنہ میں نوافل کی ادائیگی کے نئے اوقات جاری کردیئے۔
ریاض الجنہ میں نوافل کی ادائیگی کے لیے ’نسک ‘ پورٹل کے ذریعے پرمٹ جاری کرایا جائے گا جو365 دنوں میں ایک بار ممکن ہوگا۔
سعودی خبررساں ایجنسی ’ایس پی اے‘ کے مطابق انتظامیہ کی جانب سے زائرین کی سہولت کےلیے ریاض الجنہ میں نوافل کی ادائیگی کے لیے فوری پرمٹ کی سہولت بھی فراہم کی گئی ہے۔
فوری پرمٹ کا حصول اسی صورت میں ممکن ہے جب زائر مسجد نبوی الشریف کے بیرونی مرکزی دروازے کے قریب ہو اور وہاں رہتے ہوئے پرمٹ کے لیے نسک پورٹل پر خود کو رجسٹرکرائے اس صورت میں بھی پرمٹ حاصل کیا جاسکتا ہے۔
انتظامیہ کا مزید کہنا ہے کہ ریاض الجنہ کے مسجد نبوی الشریف کے جنوبی سمت میں گیٹ نمبر 37 سے داخل ہونے کی سہولت فراہم کی گئی ہے جس کا مقصد زائرین کو زیادہ سے زیادہ سہولت فراہم کرنا ہے۔
ریاض الجنہ کے لیے فاسٹ ٹریک پرمٹ بھی جاری کرایا جاسکتا ہے(فوٹو، ایس پی ا)
دوسری جانب حرمین کی انتظامیہ نے مرد وخواتین زائرین کی سہولت کےلیے روضہ شریفہ کی زیارت کے نئے اوقات بھی جاری کیے ہیں جن کے مطابق مردوں کےلیے روزانہ کی بنیاد پر ’زیارت‘ کا آغاز نصف شب کے بعد یعنی 2 بجے سے ہوگا جو نماز فجر تک جاری رہے گا۔
مردوں کے لیے ’روضہ شریفہ ‘ کی زیارت کا دوسرا وقت دن کے 11 بجے سے لے کر عشاء کی نماز تک مقرر کیا گیا ہے اس دوران مرد روضہ مبارکہ پر سلام عرض کرسکیں گے۔
ریاض الجنہ کا مجموعی رقبہ 330 مربع میٹر ہے(فوٹو، ایس پی اے)
نماز فجر کے بعد مردوں کے لیے زیارت کا وقفہ ہوگا اس دوران خواتین زائرین کےلیے زیارت کا وقت شروع ہوگا جو نماز فجر کے فوری بعد سے دن کے 11 بجے تک بعدازاں نماز عشاء سے رات 2 بجے تک ہوگا۔
جمعہ کے روز مردوں کے لیے نصف شب کے بعد رات دو بجے سے فجر کی نماز تک بعدازاں صبح 9 بج کر 20 منٹ سے 11 بج کر 20 منٹ تک جاری رہے گا ۔
مرد زائرین کے لیے نماز جمعہ کے بعد سے نماز عشاء تک کے اوقات میں زیارت روضہ شریفہ کی جاسکے گی۔
خواتین زائرین کےلیے بھی جمعہ کے لیے اوقاتِ زیارت روضہ رسول ﷺ میں تبدیلی کے بعد نئے اوقات اس طرح ہوں گے نماز فجر کے فوری بعد سے لے کر صبح کے 9 بجے تک بعدازاں نماز عشاء کے بعد سے رات کے 2 بجے تک زیارت کی جاسکے گی۔
ادارے کا کہنا تھا کہ معمر اور بیمارزائرین کےلیے ویل چیئر کے ساتھ داخل ہونے کی سہولت مہیا کی گئی ہے جس کے لیے جدا ٹریک موجود ہیں۔
معمر زائرین کے لیے ویل چیئر کی سہولت بھی فراہم کی گئی ہے(فوٹو، ایس پی اے)
خیال رہے ’روضہ شریفہ‘ (ریاض الجنہ ) حجرہ ام المومنین سیدہ عائشہ رضی اللہ عنہا کے مشرق کی جانب سے شروع ہوتا ہےاور مغربی سمت میں ممبر تک جبکہ جنوب کی جانب قبلہ کی سمت اور شمال سے حجرہ سیدہ عائشہ رضی اللہ عنہا کے اختتام تک ہے۔
ریاض الجنہ یا روضہ شریفہ کا مجموعی رقبہ 330 مربع میٹر ہے جس کی لمبائی 22 میٹر اور چوڑائی 15 میٹرہے۔ اس مقام کو مسجد نبوی الشریف کے دیگر مقامات سے نمایاں کرنے کےلیے یہاں سبز رنگ کے قالین بجھائے گئے ہیں تاکہ زائرین آسانی سے شناخت کرسکیں۔
