سعودی ولی عہد اور فرانسیسی صدر کا ٹیلی فونک رابطہ، خطے میں بڑھتی کشیدگی پر گفتگو
شہزادہ محمد بن سلمان اور فرانسیسی صدر نے اس بات پر بھی زور دیا کہ ایسے تمام اقدامات کو روکنا ضروری ہے جو سکیورٹی اور استحکام کو مزید خطرے میں ڈال سکتے ہیں۔ (فوٹو: ایس پی اے)
سعودی ولی عہد شہزادہ محمد بن سلمان نے جمعہ کے روز فرانس کے صدر ایمانوئیل میکخواں سے فون پر بات چیت کی، جس کے دوران دونوں رہنماؤں نے خطے میں جاری فوجی کشیدگی اور اس کے عالمی سلامتی پر ممکنہ اثرات پر تبادلۂ خیال کیا۔
سعودی پریس ایجنسی کے مطابق، اس گفتگو میں بڑھتی ہوئی کشیدگی کے علاقائی اور بین الاقوامی استحکام پر اثرات پر توجہ دی گئی، اور دونوں فریقوں نے حالیہ پیش رفت پر تشویش کا اظہار کیا۔
شہزادہ محمد بن سلمان اور فرانسیسی صدر نے اس بات پر بھی زور دیا کہ ایسے تمام اقدامات کو روکنا ضروری ہے جو سکیورٹی اور استحکام کو مزید خطرے میں ڈال سکتے ہیں، اور بگڑتی ہوئی صورتحال کے دوران تحمل اور بردباری اختیار کرنے کی ضرورت پر زور دیا۔
ایس پی اے کے مطابق، دونوں رہنماؤں نے خطے میں مزید کشیدگی کو روکنے اور استحکام برقرار رکھنے کے لیے جاری وسیع تر کوششوں کا بھی جائزہ لیا۔
