پاکستان پیپلز پارٹی (پی پی پی) کے چیئرمین بلاول بھٹو زرداری نے اپنی منگنی اور شادی کے متعلق پھیلنے والی خبروں کی تردید کر دی ہے۔
پیر کو ایکس پر بلاول بھٹو نے ایک ویڈیو اپلوڈ کی جس میں انہوں نے کہا کہ ’میری زندگی کا کوئی ایسا فیصلہ ہوا تو اس کا اعلان میرا خاندان کرے گا۔‘
اپنے بیان میں بلاول بھٹو نے کہا کہ ’سوشل میڈیا نے میری بات پکی، منگنی اور شادی بھی کروا دی ہے، ایسا کچھ نہیں ہوا ہے، نہ ہی میں کسی شہزادی گلوریا کو جانتا ہوں۔‘
مزید پڑھیں
انہوں نے مزید کہا کہ ’یہ سوشل میڈیا تماشا ہے جو اصل ایشو سے عوام کی توجہ ہٹانے کے لیے ہے۔‘
’سانحہ پمز میں پاکستان کے درالحکومت میں 14 بچے فوت ہوئے، ایک وزیر جو پاکستان کا گورباچوف بننا چاہتا ہے ہمارے ملک کے تیس ٹکڑے کرنا چاہتا ہے، یہ وزیر ایک ہسپتال نہیں سنبھال سکتا ہے، یہ وزیر لاہور کے بزنس مینوں سے کہہ رہا ہے صوبے بناؤ اور چلاؤ۔‘
چیئرمین پی پی پی نے کہا کہ ’یہ وزیر اس وقت کہہ رہا ہے جب سندھ اسمبلی اس معاملے پر ایک جرات مندانہ موقف لے رہی ہے۔‘
خیال رہے اس سے قبل لوکل میڈیا میں خبریں آئی تھیں کہ بلاول بھٹو اور صدر مملکت آصف علی زرداری، بلاول بھٹو کی ممکنہ منگنی کے سلسلے میں آسٹرین خاندان سے بات چیت کے لیے ویانا میں موجود ہیں۔
ایک تو سوشل میڈیا نے میری بات پکی کروادی، منگنی اور شادی بھی کروادی ہے
میں واضح کروں کہ ایسا کچھ نہیں ہوا ہے اور نہ ہی میں کسی پرنسز گلوریا کو جانتا ہوں
سوشل میڈیا پر یہ تماشے حقیقی ایشوز پر سے توجہ ہٹانے کے لئے ہوتے ہیں۔ pic.twitter.com/zI6OljDC3r— Bilawal Bhutto Zardari (@BBhuttoZardari) August 31, 2026
اس حوالے سے گردش کرنے والی خبروں میں بلاول کی ممکنہ دلہن کو آسٹریا کے سابق شاہی خاندان ’ہاؤس آف ہیبسبرگ لورین‘ سے جوڑا جا رہا ہے اور کچھ رپورٹس میں انہیں آسٹریا کے آخری شہنشاہ کارل اول کے خاندان سے بتایا گیا تھا۔
