لاہور...وزیر ریلوے خواجہ سعد رفیق نے کہاہے کہ این اے 120 کے ضمنی انتخاب میں مسلم لیگ ن ہی نہیں بلکہ جمہوریت بھی جیتی۔ جانتا ہوں کہ نواز شریف کو کیوں نکالا گیا؟ نجی ٹی وی چینل سے گفتگو کرتے ہوئے انہوں نے کہاکہ نواز شریف جلد پاکستان آجائیں گے۔انہوں نے کہا کہ موروثی سیاست کے خلاف ہوں لیکن سیاستدانوں کے بچے اگر مار کھائیں تو آگے آنا ان کا حق ہے۔ مریم نواز محنت کر رہی ہیں مگر انہیں محتاط گفتگو کرنی چاہیے۔انہوں نے کہاکہ نواز شریف کی قیادت میں سب متحد ہیں ۔ بیگم کلثوم نواز کو وزیراعظم بنانے کی پارٹی میں کوئی بات نہیں ہوئی اور پارٹی میں دھڑے بندی کی باتیں بھی درست نہیں۔ایک سوال پر انہوں نے کہا کہ چوہدری نثار ہمارے سینیئر ہیں۔ ان کی اپنی رائے ہوتی ہے۔ این اے 120 کے نتائج سے پی ٹی آئی ، پیپلزپارٹی اور جماعت اسلامی کو سبق سیکھنا چاہیے۔انہوں نے کہاکہ ہند بڑا ملک ہے اسے سمجھداری سے خطے میں امن قائم کرنا ہوگا۔ ہندوستانی فوج افغانستان اور بلوچستان میں نفرتیں بڑھا رہی ہے اور ہندوستانی فوج کی سازشوں کا بھرپور جواب دینا ضروری ہوتا ہے۔
