کراچی ... سپریم کورٹ کے حکم پر سابق صوبائی وزیر اطلاعات شرجیل انعام میمن اور شاہ زیب قتل کیس کے مرکزی ملزم شاہ رخ جتوئی کو اسپتال سے جیل بھیج دیا گیا ۔ہفتہ کوسپریم کورٹ کراچی رجسٹری میں شرجیل میمن کو بیماری کے باعث اسپتال منتقل کرنے کے کیس کی سماعت ہوئی۔ چیف جسٹس نے آئی جی جیل خانہ جات سے استفسار کیا کہ شرجیل میمن کب سے اور کیوں اسپتال میں ہیں؟ آئی جی جیل خانہ جات نے بتایا سندھ ہائی کورٹ نے شرجیل میمن کی ضمانت مسترد کرکے جیل بھیجا تھا تاہم نیب کورٹ نے بیماری کے باعث میڈیکل بورڈ بنانے کی ہدایت کی پھر ڈاکٹروں کی سفارش پر انہیں اسپتال منتقل کردیا گیا۔چیف جسٹس نے کہا کہ نیب کورٹ نے تو لکھا تھا کہ شرجیل میمن کا علاج جیل میں کرائیں صرف ٹیسٹ کرانے کا کہا تھا۔ اسپتال منتقل کرنے کا کہاں لکھا ہے؟ قیدی کو اسپتال بھیجنے کا اختیار آپ کو کہاں سے ملا؟ تمام رپورٹیں اور بورڈ خود ساختہ ہیں۔ کسی عدالت نے شرجیل میمن کو اسپتال بھیجنے کا حکم نہیں دیا۔ میڈیکل رپورٹ اور میڈیکل بورڈ بھی طلب کرلیتے ہیں۔ جہاں بااثر ملزمان کو رکھا گیا ہے وہاں نوگو ایریا بنایا ہوا ہے۔ باڑ لگا کر راستے بھی کررکھے ہیں۔چیف جسٹس نے کہا کہ ہم دیکھیں گے کہ شرجیل میمن کا کیس کس طرح پنجاب بھیج دیں۔ عدالت عظمی کے پاس اختیار بھی موجود ہے اور قانون بھی ہے۔ عدالت نے آئی جی جیل خانہ جات کو حکم دیا کہ شرجیل میمن کو آج ہی جیل منتقل کیا جائے بلکہ جتنے بھی ملزمان اسپتال میں رکھے گئے ہیں انہیں واپس جیل بھیجا جائے عدالتی حکم پر عملدرآمد نہ ہوا تو سخت کارروائی کی جائے گی۔
