رسول بخش پلیجو انتقال کر گئے

  کراچی....سینئیر سیاستدان اور عوامی تحریک کے بانی رسول بخش پلیجو طویل علالت کے بعد 88 برس کی عمر میں انتقال کرگئے۔ طویل عرصے سے علیل تھے۔انہیں سانس، دل اور سینے میں تکلیف کی شکایت تھی۔ نجی اسپتال میں زیر علاج تھے۔ترجمان عوامی تحریک کے مطابق رسول بخش پلیجو کی میت کو تدفین کے لئے آبائی علاقے جنگ شاہی لے جایا جائےگا۔ نماز جنازہ اور تدفین جمعہ کو ہوگی۔رسول بخش پلیجو 21 فروری 1930 کو جنگ شاہی،ٹھٹھہ میں پیدا ہوئے۔ ابتدائی تعلیم اپنے آبائی علاقے اور سیکنڈری تعلیم سندھ مدرستہ الاسلام کراچی سے حاصل کی۔بعدازاں سندھ لاءکالج سے گریجویشن کی اور سپریم کورٹ میں وکیل کی حیثیت سے بھی خدمات سرانجام دیں۔رسول بخش پلیجو نے ون یونٹ کے خاتمے اور بحالی جمہوریت تحریک میں سرگرم کردار ادا کرنے کے ساتھ سندھ میں پہلی مرتبہ خواتین کو سیاست میں منظم کیا۔رسول بخش پلیجو نے سیاسی زندگی کے تقریباً 11 سال مختلف جیلوں میں گزارے۔ کوٹ لکھپت جیل میں قید کے دوران انہوں نے ایک ڈائری بھی لکھی، جو سندھی زبان میں بہت مقبول کتاب رہی۔