ٹھنڈے پکوڑے پیش کرنے پر ساس کا قتل

انڈیا کے دارالحکومت دہلی میں ساس کو قتل کرکے فرار ہونیوالے نوجوان کو پولیس نے اتر پردیش کے شہر غازی پور سے گرفتار کرلیا۔

اطلاع کے مطابق ملزم افروز نے پکوڑے کے مسئلے پر بحث کے دوران ساس کو قتل کردیا۔ اس کی شادی گزشتہ سال شائستہ سے ہوئی تھی۔

شادی کے بعد دونوں شمال مغربی دہلی کے کیشوپورم علاقے میں کرائے کے مکان میں سکونت پذیر تھے۔ شادی کے بعد ساس فوزیہ افروز کے پاس رہنے کے لیے آئی۔

پولیس نے بتایا کہ ساس کے آنے سے شوہر بیوی میں لڑائی شروع ہوگئی۔

واقعے کے دن شائستہ نے پکوڑے بنائے اور کچھ پکوڑے شوہر کے لیے  بھی رکھ دیے۔ جب شام کو افروز کام سے گھر واپس آیا تواس نے شائستہ سے ٹھنڈے پکوڑے کا شکوہ کیا۔ اس پر دونوں کے درمیان تلخ کلامی کے بعد جھگڑا شروع ہوگیا۔

ساس فوزیہ جھگڑا ختم کرانے کے لیے آئی تو افروز نے اسے دھار دار آلے سے  حملہ کر کے ہلاک کر دیا۔

اس دوران شائستہ بھی زخمی ہوگئی۔ پولیس نے ملزم کیخلاف رپورٹ درج کر کے تحقیقات شروع کر دی۔

مزید پڑھیں:- - - -بھینس چرانے کے تنازع پردبنگوں نے کسان کو موت کے گھاٹ اتاردیا