انتہائی مطلوب21دہشت گردوں کی فہرست جاری

راولپنڈی ... محکمہ انسدا د دہشت گردی( سی ٹی ڈی) نے خودکش حملوں میں معاونت کرنے اور دہشت گردی کی کارروائیوں میں ملوث انتہائی مطلوب 21 دہشت گردوں کی فہرست جاری کردی۔فہرست میں شامل 18 دہشت گردوں کے سر پر حکومت کی جانب انعامی رقم بھی مقرر کی گئی ، جس کی مالیت ایک کروڑ ر سے لے کر 2 لاکھ روپے تک ہے۔ان دہشت گردوں میں سرفہرست اور سب سے خطرناک ملزم مطیع الرحمن عرف صمد سیال ہے جس کے سر کی قیمت ایک کروڑ روپے رکھی گئی۔ سندھ حکومت کی جانب سے بھی اس کے سر کی قیمت 10 لاکھ روپے مقرر ہے۔ملزم سابق صدر جنرل (ر) پرویز مشرف اور سابق وزیر اعظم شوکت عزیز کے جلسے میں خودکش حملوں میں ملوث ہے۔ اس کا تعلق لشکر جھنگوی، تحریک طالبان اور حرکت جہاداسلامی سے ہے۔ فہرست میں سری لنکن کرکٹ ٹیم پر ہونے والے حملے، لاہور میں ایف آئی اے کے دفتر، سابق وزیراعظم بے نظیر بھٹو اور پنجاب کے سابق وزیر داخلہ کرنل(ر) شجاع خانزادہ پر ہونے والے خود کش حملوں اور پولیس اہلکاروں سمیت فرقہ وارانہ قتل و غارت گری اور دہشت گردی کی دیگر کارروائیوں میں ملوث دہشت گرد شامل ہیں۔ان دہشت گردوں کی فہرست میں شناختی علامات اور تفصیلات بھی موجود ہیں ۔ فہرست کو جاری کرنے کا مقصد گرفتاری میں شہریوں کی مدد حاصل کرنا ہے۔