غیر قانونی تارکیں وطن کو روکنے کے لیے امریکہ اور میکسیکو کے درمیان معاہدہ

میکسیکو کے ساتھ معاہدے کا اعلان ٹرمپ نے ٹویٹ کے ذریعے کیا۔ تصویر اے ایف پی
امریکی صدر ڈونلڈ ٹرمپ نے اعلان کیا ہے کہ امریکہ کا میکسیکو کے ساتھ غیر قانونی تارکین وطن کو روکنے کے حوالے سے معاہدہ طے پا گیا ہے اور میکسیکو کے خلاف مجوزہ ٹیرف یا ٹیکس کو غیر معینہ مدت کے لیے معطل کر دیا گیا ہے۔
صدر ٹرمپ نے اپنے ٹویٹر اکاؤنٹ سے ٹویٹ کیا کہ ’میں انتہائی مسرت کے ساتھ اس بات کا اعلان کرتا ہوں کہ امریکہ کا میکسیکو کے ساتھ معاہدہ طے پا گیا ہے اور میکسیکو کے خلاف ٹیرف جو کہ امریکہ نے پیر سے نافذ کرنا تھا کو غیر معینہ مدت کے لیے معطل کر دیا گیا ہے۔‘
 ٹرمپ کا مزید کہنا تھا کہ میکسیکو نے امریکہ کی جنوبی سرحدوں سے تارکین وطن کے خلاف سخت اقدامات اٹھانے پر رضامندی ظاہر کی ہے۔ یہ اقدام غیر قانونی تاریکین وطن کے امریکہ میں داخلے کو کم کرنے یا مکمل طور پر ختم کرنے کے لیے اٹھایا جا رہا ہے۔


امریکی صدر ڈونلڈ ٹرمپ کا ٹویٹ

ٹرمپ کا اعلان امریکہ اور میکسیکو کے درمیان امریکہ کے سٹیٹ ڈیپارٹمنٹ میں ہونے والے تین روزہ مذاکرات کے احتتام کے بعد سامنے آیا ہے۔ امریکہ مطالبہ کرتا رہا ہے کہ میکسیکو سینٹرل امریکن تارکین وطن کو میکسیکو کی سرحد سے امریکہ میں داخلے کے خلاف کریک ڈاؤن کرے۔
میکسیکو کے وزیر خارجہ مارسیلو ابرارڈ نے معاہدے کے بعد ٹویٹ کیا کہ ’امریکہ کی جانب سے پیر سے مجوزہ ٹیرف کا نفاذ اب نہیں ہوگا۔ ان تمام لوگوں کا شکریہ جنہوں نے ہماری مدد کی اور دکھایا کہ میکسیکو ایک عظیم ملک ہے۔‘
امریکہ کے سٹیٹ ڈیپارٹمنٹ میں دونوں ممالک کے درمیان تین روزہ مذاکرات کے بعد جاری ہونے والے مشترکہ اعلامیے میں بھی کہا گیا ہے کہ میکسیکو سینٹرل امریکن تارکین وطن کی امریکہ میں داخلے کو روکنے لے لیے غیر معمولی اقدامات اٹھائے گا جس میں بارڈر پر نیشنل گارڈز کے فوجیوں کی تعیناتی بھی شامل ہے۔


وسطی امریکہ کے تارکیں وطن امریکہ میں غیر قانونی داخلے کے لیے میکسیکو کے سرحدوں کا استعمال کرتے ہیں۔ تصویر اے ایف پی 

خیال رہے کہ یہ معاہدہ ایک ایسے وقت میں سامنے آیا ہے جب امریکی صدر ٹرمپ نے پیر سے میکسیکو کے تمام برآمدات پر  پانچ فیصد ٹیرف بطور سزا عائد کرنے کا اعلان کیا تھا۔
مشرکہ اعلامیے میں مزید کہا گیا ہے کہ میکسیکو انسانی سمگلنگ میں ملوث گروپوں کے خلاف بھی کارروائی کرے گا۔
دوسری جانب امریکہ سیاسی پناہ کے لیے درخواست دینے والے تارکیں وطن کو ان کی درخواستوں پر فیصلے تک واپس میکسیکو بھیجے گا جہاں وہ اپنی درخواستوں پر فیصلے تک انتظار کریں گے۔

شیئر: