’نئے ویزوں کے لیے پروفیشن ٹیسٹ دینا ہو گا‘

وزارت محنت وسماجی فروغ میں ’پروفیشن ٹیسٹ پروگرام‘ کے سربراہ نایف العمیر نے کہا ہے کہ ’نئے ویزوں پر آنے والوں کو پروفیشن ٹیسٹ دینا ہوگا‘۔

انہوں نے بتایا ہے کہ ’پروفیشن ٹیسٹ کا آغاز دسمبر سے اختیاری ہوگا جبکہ بہت جلد اسے لازمی کردیا جائے گا‘۔

نایف العمیر نے کہا ہے کہ ’نئے ویزے پر آنے والے جس پیشے پر کام کرنے کے لیے آرہے ہیں انہیں پہلے اپنے ملک میں اس کا ٹیسٹ دینا ہوگا‘۔

• مزید پڑھیں: سعودی عرب میں لیبر کا ویزا جلد ہی ختم کر دیا جائے گا

انہوں نے بتایا ہے کہ ’اس مقصد کے لیے مختلف ممالک میں چند اداروں کا انتخاب کیا جائے گا جہاں پروفیشن ٹیسٹ دیا جاسکے گا‘۔

انہوں نے کہا ہے کہ ’نئے ویزے پر آنے والوں سے پروفیشن ٹیسٹ کے لیے ایک سو سے 150 ریال فیس وصول کی جائے گی‘۔

انہوں نے واضح کیا ہے کہ ’پروفیشن ٹیسٹ کا آغاز نئے ویزوں پر آنے والوں سے کیا جارہا ہے جبکہ مستقبل قریب میں ملک میں موجود غیر ملکی کارکنان کا بھی پروفیشن ٹیسٹ ہوگا‘۔

العمیر نے بتایا ہے کہ ’پروفیشن ٹیسٹ پاس کرنے والے کو 5 سال کے لیے سرٹیفکیٹ دیا جائے گا۔ مدت ختم ہونے کے بعد دوبارہ ٹیسٹ دے کر اس کی تجدید ہوگی‘۔

انہوں نے کہا ہے کہ ’اندرون ملک موجود غیر ملکی کارکنان کے اقاموں کی تجدید کو پروفیشن ٹیسٹ سے جوڑنا بھی بعید نہیں‘۔

• خود کو اپ ڈیٹ رکھیں، واٹس ایپ گروپ جوائن کریں