’اقامہ ایکسپائر ہونے پر بینک اکاونٹ منجمد نہیں ہوگا‘

سعودی عریبین مانیٹری اتھارٹی (ساما) نے تمام بینکوں اور مالیاتی اداروں کو ہدایت کی ہے کہ جن کھاتے داروں کے اے ٹی ایم کارڈ ختم ہوگئے ہوں یا ختم ہونے والے ہوں ان کی تاریخ 10 شوال 1441 ھ تک بڑھا دی جائے-

عاجل ویب سائٹ کے مطابق ساما نے یہ پابندی بھی لگائی ہے کہ اے ٹی ایم کارڈ میں توسیع کرتے وقت کھاتے داروں کی منظوری ضرور لی جائے۔ توسیع کی کارروائی میں کھاتے داروں کو ضروری سہولت مہیا کی جائے اور ممکنہ وسائل کی مدد سے تجدید شدہ کارڈ کھاتے داروں تک پہنچائے جائیں-

ساما نے قومی شناختی کارڈ یا اقامے کی تاریخ ختم ہوجانے کی وجہ سے بینک اکاؤنٹ منجمد نہ کرنے کی بھی ہدایت کی ہے- اسی طرح اکاؤنٹ ایکٹیو نہ ہونے کی صورت میں اسے منجمد کرنے کی پابندی بھی معطل کرنے کے لیے کہا ہے-

ساما نے بینکوں کو ایک ہدایت یہ بھی دی ہے کہ اگر شناختی کارڈ ختم ہونے یا مختار نامے کی میعاد ختم ہوجانے کی وجہ سے سجل تجاری  کی توسیع نہ ہوئی ہو- اسی طرح کمپنیوں واداروں کے اکاؤنٹ کسی قسم کے اسباب کی وجہ سے منجمد کردیے گئے ہوں تو انہیں بھی کھول دیا جائے اور تا اطلاع ثانی منجمند کھاتے بحال کردیے جائیں-

ساما نے اپنی ویب سائٹ پر بیان میں کہ یہ ساری سہولتیں نئے کورونا وائرس سے پیدا ہونے والے مسائل حل کرنے کی خاطر دی جارہی ہیں-

بحرانی حالات میں کھاتےداروں کو بینک خدمات سے فائدہ اٹھانے کی راہ میں جو مشکلات پیش آرہی ہیں انہیں دورکرنے کی وجہ سے نئی سہولتیں مہیا کی جارہی ہیں-

 خود کو اپ ڈیٹ رکھیں، واٹس ایپ گروپ جوائن کریں