انڈیا: وینٹیلیٹر کا پلگ ہٹا کر ایئر کولر چلا دیا، مریض ہلاک

کورونا وائرس کی موجودہ صورتحال میں دنیا سے آئے روز کوئی نہ کوئی انوکھی خبر سامنے آتی رہتی ہے۔ ایسا ہی واقعہ انڈین ریاست راجھستان کے شہر کوٹہ میں پیش آیا ہے جہاں ہسپتال میں زیر علاج مریض اس لیے ہلاک ہو گیا کہ اس کے خاندان والوں نے مریض کو لگے وینٹی لیٹر کے پلگ کو سوئچ بورڈ سے ہٹا کر ایئر کولر کا پلگ لگایا۔

انڈین نیوز چینل این ڈی ٹی وی کے مطابق ہسپتال کی انتظامیہ اس واقعے کی تحقیقات کر رہی ہے۔

مریض کو کورونا وائرس کے شبے میں انتہائی نگہداشت وارڈ میں داخل کروایا گیا تاہم اس کا ٹیسٹ منفی آیا تھا۔ اسے 15 جون کو آئسولیشن وارڈ میں منتقل کیا گیا کیونکہ آئی سی یو میں ایک اور مریض میں کورونا کی تشخیص ہوئی تھی۔

آئسولیشن وارڈ میں گرمی کی وجہ سے مریض کی فیملی نے اسی دن نیا ایئر کولر خریدا اور مبینہ طور پر قریب کوئی سوئچ بورڈ نہ ملنے پر انہوں نے وینٹی لیٹر کا پلگ اتار کر وہاں کولر لگا دیا، اور آدھے گھنٹے کے بعد وینٹی لیٹر کی پاور ختم ہو گئی۔

انہوں نے عملے کو اطلاع دی لیکن اس وقت تک مریض مر چکا تھا۔

ہسپتال کے سپرینٹنڈنٹ ڈاکٹر نوین سیکسینا کا کہنا تھا کہ اس واقعے کی تحقیق کی جا رہی ہے اور اس کی رپورٹ سنیچر کو جاری کی جائے گی۔

تحقیقاتی کمیٹی نے ڈیوٹی پر تعینات عملے کے بیان ریکارڈ کر لیے ہیں لیکن مرنے والے کے لواحقین کی طرف سے کوئی جواب موصول نہیں ہو رہا۔

ڈاکٹرز کا کہنا ہے کہ جو بھی ملوث ہوا اس کے خلاف ایکشن لیا جائے گا۔

ہسپتال انتظامیہ کے مطابق مریض کے خاندان والوں نے کولر لگانے کی اجازت نہیں لی تھی اور جب مریض مر گیا تو انہوں نے میڈیکل سٹاف اور ڈاکٹر کے ساتھ ’بد تمیزی‘ کی۔

انڈیا میں کورونا وائرس تیزی سے پھیل رہا ہے اور اب تک ساڑھے 12 ہزار سے زائد اموات ہو چکی ہیں اور متاثرین تین لاکھ 80 ہزار سے زیادہ ہیں۔