کورونا وائرس کا ٹیسٹ مثبت آنے کے بعد امریکی صدر ڈونلڈ ٹرمپ کو علاج کے لیے ملٹری ہسپتال میں داخل کر دیا گیا ہے۔
خبر رساں ادارے ’اے ایف پی‘ کے مطابق صدر ٹرمپ کو جمعے کی رات والٹر ریڈ ملٹری ہسپتال میں ہیلی کاپٹر کے ذریعے منتقل کیا گیا جہاں ان کا علاج جاری ہے۔
ریپبلکن پارٹی کے صدارتی امیدوار ڈونلڈ ٹرمپ کو کورونا سے متاثر ہونے کے بعد انتخاباتی مہم بھی معطل کرنا پڑی ہے۔
مزید پڑھیں
-
ٹرمپ میں وائرس کی ’معتدل علامات‘، بائیڈن کا ٹیسٹ منفیNode ID: 508661
-
صدر ٹرمپ کے کورونا وائرس کے بارے میں مشہور بیاناتNode ID: 508701
جبکہ آئندہ ماہ نومبر میں ہونے والے امریکی صدارتی انتخابات میں صدر ٹرمپ کے حریف اور ڈیموکریٹ جماعت سے تعلق رکھنے والے سابق نائب صدر جو بائیڈن کا کورونا ٹیسٹ منفی آیا ہے۔
صدر ٹرمپ نے ہسپتال کے لیے روانہ ہونے سے پہلے اٹھارہ سیکنڈز کا ویڈیو پیغام اپنے ٹوئٹر اکاؤنٹ پر جاری کیا ہے۔
امریکی صدر نے اپنے پیغام میں کہا کہ وہ ہسپتال میں داخل ہونے جا رہے ہیں تاہم ان کی طبیعت ٹھیک ہے۔
— Donald J. Trump (@realDonaldTrump) October 2, 2020
انہوں نے اہلیہ میلانیا ٹرمپ کے حوالے سے بتایا کہ ان کی طبیعت بھی ٹھیک ہے۔
وائٹ ہاؤس سے جاری ہونے والے بیان میں کہا گیا ہے کہ طبی ماہرین نے صدر ٹرمپ کو آئندہ چند دنوں کے لیے والٹر ریڈ ہسپتال میں قائم صدارتی دفتر سے اپنے فرائض سرانجام دینے کو کہا ہے۔
بیان کے مطابق صدر ٹرمپ کو احتیاطی بنیادوں پر ہسپتال منتقل کیا گیا ہے تاکہ کورونا وائرس کی معتدل اعلامات بگڑنے نہ پائیں۔
قبل ازیں 74 سالہ ٹرمپ کے مشیر مارک میڈوز نے کہا تھا کہ صدر میں کورونا وائرس کی ’معتدل‘ علامات ہیں اور تواناں ہونے کے ساتھ صدر ٹرمپ کے حوصلے بلند ہیں۔
جمعے کی رات کو وائٹ ہاؤس کے معالج شون کونلی نے جاری بیان میں کہا تھا کہ صدر ٹرمپ کو اینٹی باڈی کاکٹیل ریجنرون کی ایک خوراک دی گئی ہے۔ واضح رہے کہ کورونا وائرس کے علاج کے لیے ریجنرون کے کلینکل تجربات جاری ہیں، تاہم ڈرگ اتھارٹی نے فی الحال اس کے استعمال کی منظوری نہیں دی ہے۔
Tonight, @FLOTUS and I tested positive for COVID-19. We will begin our quarantine and recovery process immediately. We will get through this TOGETHER!
— Donald J. Trump (@realDonaldTrump) October 2, 2020
جمعرات کی رات کو ڈونلڈ ٹرمپ نے ٹویٹ کے ذریعے اعلان کیا تھا کہ ان کا اور ان کی اہلیہ میلانیا ٹرمپ کا کورونا وائرس کا ٹیسٹ مثبت آنے کے بعد خود کو قرنطینہ کر رہے ہیں۔
اس سے قبل ایک اور ٹویٹ میں ٹرمپ نے کہا تھا کہ ان کی مشیر ہوپ ہکس کا کورونا ٹیسٹ مثبت آنے کے بعد ان کے اور اہلیہ میلانیا ٹرمپ کا بھی ٹیسٹ ہوا ہے جس کا نتیجہ آنے تک انہوں نے خود کو قرنطیہ کر لیا ہے۔
باخبر رہیں، اردو نیوز کو ٹوئٹر پر فالو کریں