جی ٹوئنٹی نے دنیا کو اعتماد اور امید کا پیغام دیا ہے: شاہ سلمان

خادم حرمین شریفین شاہ سلمان بن عبدالعزیز آل سعود نے جی ٹوئنٹی کی 15ویں سربراہ کانفرنس کے اختتامی اجلاس سے خطاب کرتے ہوئے کہا کہ ہم اپنے عوام اور دنیا بھر کی اقوام کے دلوں میں اطمینان اور امید کے دیے روشن کرنے میں کامیاب ہو گئے۔

سعودی خبر رساں ادارے ’ایس پی اے‘ کے مطابق شاہ سلمان نے جی ٹوئنٹی کے قائدین کو مخاطب کرتے ہوئے کہا کہ گذشتہ دو روز کے دوران بھرپور شرکت پر میں آپ کا شکر گزار ہوں۔

شاہ سلمان نے کہا کہ سعودی عرب بین الاقوامی تعاون کے لیے جی ٹوئنٹی میں کلیدی کردار ادا کرتا رہے گا۔ عالمی چیلنجوں کو قابو کرنے میں انفرادی اور اجتماعی کوششیں فیصلہ کن ثابت ہوں گی۔  

سعودی عرب کے فرمانروا کا کہنا تھا کہ مستقبل کی خاطر ہمیں دنیا بھر کے انسانوں کو بااختیار بنانے، کرہ ارض کے تحفظ اور نئے افق دریافت کرنے کے لیے جدوجہد کرنا ہو گی۔

’سعودی عرب اپنی علاقائی و بین الاقوامی حیثیت اور تین براعظموں کو جوڑنے والے اپنے محل و قوع اور ترقی یافتہ اور نئی مارکیٹیوں کے درمیان پل کا درجہ رکھنے کے باعث جی ٹوئنٹی میں عالمی تعاون کی خاطر کلیدی کردار ادا کرتا رہے گا۔‘  

شاہ سلمان نے کہا کہ سال رواں 2020 کے دوران ہم نے کافی کچھ حاصل کیا۔ کورونا وبا سے ابھرنے والے چیلنجوں سے نمٹنے کے لیے اپنے عہد و پیماں پورے کیے۔ جی ٹوئنٹی کی کامیابی کا راز تعاون کا جذبہ ہے۔ اسے ازسرنو ترو تازہ کرنے میں کامیاب رہے۔

شاہ سلمان نے کہا کہ ہم نے ایسی اہم پالیسیاں اختیار کیں جن کی بدولت بحرانی حالات سے دنیا بھر کے ممالک باہر آنے لگے۔ مضبوط ، پائیدار، جامع اور متوازن معیشت کا ہدف حاصل کرنے کے لیے ہماری پالیسیاں کارگر رہیں۔ ہماری کوشش رہی ہے کہ بین الاقوامی تجارتی نظام سب کے لیے موزوں ہوں اور سب کے لیے پائیدار ترقی کے حالات مہیا ہوں۔

 شاہ سلمان بن عبدالعزیز نے 2021 میں جی ٹوئنٹی کی قیادت کی باگ ڈور اٹلی کے وزیراعظم کے حوالے کرتے ہوئے امید ظاہر کی کہ اٹلی گروپ کی قیادت کامیابی سے انجام دے گا اور ہم اس کی ہر ممکن مدد کے لیے تیار ہیں۔  

شاہ سلمان نے اس موقع پر 2019 کے دوران گروپ کے قائد جاپان اور 2021 میں جی ٹوئنٹی کے قائد اٹلی کا 2020 کے دوران تعاون فراہم کرنے پر شکریہ ادا کیا۔  

شاہ سلمان نے اس سے قبل کہا کہ تاریخ میں پہلی بار سعودی عرب کو جی ٹوئنٹی کی قیادت کا اعزاز حاصل ہوا۔ یہ سال بڑے بڑے چیلنج لے کر آیا، تاہم مملکت نے رکن ممالک کے تعاون سے چیلنجوں کا بھرپور طریقے سے مقابلہ کیا۔  

سعودی ولی عہد شہزادہ محمد بن سلمان نے سربراہ کانفرنس کے اختتام پر مشترکہ اعلامیہ پیش کیا۔