ضمانت منسوخ ہوتے ہی مریم نواز جیل جا رہی ہیں: فردوس عاشق اعوان

وزیر علی پنجاب کے معاون خصوصی برائے اطلاعات فردوس عاشق اعوان نے کہا ہے کہ حکومت کہیں نہیں جا رہی بلکہ مریم نواز ضمانت پر ہیں اور ضمانت خارج ہوتے ہی وہ جیل جا رہی ہیں۔

مقامی میڈیا کے مطابق لاہور میں صحافیوں سے گفتگو میں فردوس عاشق اعوان کا کہنا تھا ’مریم نواز جو روز سیاسی چٹکلے چھوڑ رہی ہے کہ حکومت گھر جارہی ہے، لیکن حکومت کہیں نہیں جارہی ہے البتہ مریم نواز جو ضمانت پر ہے ضمانت خارج ہوتے ہی جیل جارہی ہیں۔

اپوزیشن اتحاد کے لاہور جلسے کے بارے میں فردوس عاشق اعوان کا کہنا تھا کہ مینار پاکستان پر پی ڈی ایم کی سیاسی لاشوں کا پوسٹ مارٹم ہو گا کیونکہ حکومت ان بازوؤں کے زور اور طاقت کو آزمانا چاہتی ہے۔

ان کا کہنا تھا کہ ’ذہنی معذوری کے شکار پی ڈی ایم کے ٹولے نےعوام سے بدلہ لینے کا فیصلہ کیا ہے جنہوں نے انہیں مسترد کردیا تھا۔ انہیں کورونا کے آگے دھکیل دیا ہے اور عوام کو اپنی خواہشات کا ایندھن بنا کے اس کورونا کی بھٹی میں جھونک کر اپنے مفادات کا تحفظ کرنا چاہتے ہیں۔‘

معاون خصوصی نے مزید کہا  ’سیاسی منظرنامے کو اپاہج کر کے عوام کو سیاسی غلام بنایا اور ہم سیاسی غلامی کا شکار ان معصوم عوام کو وزیراعظم عمران خان کی قیادت میں اس سیاسی غلامی سے بھی نجات دلائیں گے اور سیاسی معذوری کا شکار ان ذہنی معذوروں کا بھی بہتر طریقے سے علاج کریں گے۔‘

مریم اورنگزیب کی جانب سے وزیر اعظم عمران خان سے 13 دسمبر سے قبل استعفیٰ طلب کرنے کے سوال پر فردوس عاشق اعوان نے کہا کہ یہی ذہنی معذوری کی سب سے بڑی نشانی ہے۔

ان کا کہنا تھا کہ جو سیاسی لولے لنگڑے حکومت کو گیدڑ بھبکیوں کے ذریعے نیچا دکھانے میں مصروف عمل ہیں ان کو سمجھ یہ نہیں آ رہی کہ یہ حکومت دشمنی نہیں بلکہ آپ عوام دشمنی کر رہے ہیں۔