گوادر میں جدید شپ یارڈ: ’مقامی افراد کو ملازمتیں دی جائیں گی‘

بلوچستان کے ساحلی شہر گوادر میں ملک کا سب سے بڑا شپ یارڈ بنانے کا فیصلہ کیا گیا ہے، جہاں جدید بحری جہازوں کی تیاری اور مرمت کا کام ہو گا۔

منگل کو وزیراعلیٰ سیکرٹریٹ کوئٹہ میں وفاقی اور صوبائی حکومتوں کے درمیان گوادر شپ یارڈ تعمیر کرنے کے منصوبے کی مفاہمتی یادداشت پر دستخط ہوئے۔

وفاق کی طرف سے دفاعی پیداوار کے ایڈیشنل سیکریٹری غلام جعفر جبکہ بلوچستان کی طرف سے صوبائی سیکریٹری صنعت حافظ عبدالماجد نے یادداشت پر دستخط کیے۔

وزیر دفاعی پیداوار زبیدہ جلال نے منصوبے کو تاریخی قرار دیتے ہوئے کہا کہ ’انڈیا میں اس وقت 43 اور بنگلہ دیش میں 26 شپ یارڈز ہیں جبکہ پاکستان میں صرف ایک شپ یارڈ کراچی میں ہے۔‘

بقول ان کے ’یہ کراچی شپ یارڈ سے بڑا ہو گا اور منصوبے کا دفتر گوادر میں کھول دیا گیا ہے‘

’اس کی فیزیبلٹی سٹڈی کا کام دو سے تین سال میں مکمل ہونے کے بعد عملی کام شروع کر دیا جائے گا۔‘

وزیر دفاعی پیدوار کے مطابق ’منصوبے سے مقامی افراد کو روزگار مہیا ہونے کے ساتھ ساتھ بلوچستان کو آمدنی بھی حاصل ہوگی۔‘

انہوں نے کہا کہ ’شپ یارڈ کی ملازمتوں میں بلوچستان اور گوادر کے مقامی نوجوانوں کو ترجیح دی جائے گی۔‘

ان کا کہنا تھا کہ ’گوادر کے کپڑ گاؤں میں جہاں شپ یارڈ قائم کیا جائے گا وہاں سے مقامی آبادی کو بے دخل نہیں کیا جائے گا بلکہ سماجی ذمہ داری کے تحت تعلیم، صحت اور دیگر بنیادی سہولیات بھی فراہم بھی کی جائیں گی۔‘

وزیر اعلیٰ بلوچستان جام کمال خان نے اس موقع پر اپنی گفتگو میں کہا کہ ’گوادر شپ یارڈ کا جوائنٹ وینچر ایک تاریخی منصوبہ ہے جو مستقبل میں بلوچستان کی معاشی و اقتصادی ترقی میں اہم کردار ادا کرے گا۔‘