’آپ نے سفری بیگ تیار کرلیے‘ السعودیہ کی ٹویٹ اور وضاحت

سفری پابندیوں کے خاتمے سے متعلق سعودی عریبین ایئرلائنز (السعودیہ) نے سوشل میڈیا پر وائرل ٹویٹ کے حوالے سے وضاحت جاری کی ہے۔

السعودیہ کی ٹویٹ کے بعد سینکڑوں سعودی شہریوں اور مقیم غیرملکی بغیر پابندیوں کے سفر کی اجازت کے بارے میں سوالات کر رہے ہیں۔ 

العربیہ نیٹ کے مطابق السعودیہ نے ٹویٹ کیا تھا کہ ’آپ نے سفری بیگ تیار کرلیے؟‘ اس ٹویٹ سے السعودیہ کا اشارہ اس بات کی طرف تھا کہ سفری پابندیاں ختم ہونے جارہی ہیں۔ 

السعودیہ کے معاون ڈائریکٹر جنرل خالد طاش نے قیاس آرائیوں پر تبصرہ کرتے ہوئے کہا کہ’ السعودیہ 17 مئی 2021 سے بین الاقوامی پروازوں کی تیاریاں مکمل کیے ہوئے ہے۔ محکمہ شہری ہوابازی نے سفری پابندیاں اٹھانے کی یہ تاریخ پہلے سے مقرر کررکھی ہے‘۔ 

عکاظ اخبار کے مطابق السعودیہ کے عہدیدار نے کہا کہ ’السعودیہ کے ٹویٹ کا مطلب یہی ہے کہ بین الاقوامی سفر پر عائد تمام پابندیاں 17 مئی سے ختم ہونے جارہی ہیں‘۔ 

محکمہ شہری ہوابازی نے سعودی شہریوں کے بیرونی سفر کی تاریخ میں ترمیم کی تھی۔

اس سے قبل السعودیہ نے کہا تھا کہ اس نے آئی اے ٹی اے کے ساتھ  ایاٹا  ٹریول پاس الیکٹرانک مسافر دستاویز آزمانے کے لیے تعاون کا معاہدہ کیا ہے۔

یہ معاہدہ بین الاقوامی سفر کو محفوظ بنانے کی غرض سے کیا گیا ہے۔ ایاٹا ٹریول پاس سمارٹ ایپ ہے اور یہ  موبائل پر مہیا ہوگی۔

اس کی بدولت سفر کرنے والے ڈیجیٹل پاس حاصل کرسکیں گے۔ اس میں کورونا وائرس ویکسین اور مطلوبہ معلومات ڈاؤن لوڈ کرسکیں گے۔ ایاٹا ٹریول پاس  تمام ہوائی اڈوں پر سرکاری صحت تقاضے  پورے کرے گا۔

السعودیہ دنیا کی ان فضائی کمپنیوں میں سے ایک ہے جو ایاٹا ٹریول پاس پروگرام کو کامیاب بنانے کے سلسلے میں ایاٹا سے تعاون کا معاہدہ کرچکی ہیں۔ اس کی بدولت مسافر حضرات کسی مشکل کے بغیر سفر کرسکیں گے۔