المندق کمشنری میں پہاڑ برف سے ڈھک گئے

جنوبی سعودی عرب کی معروف کمشنری المندق کے پہاڑ برفپوش ہوگئے ہیں  گویا پہاڑوں نے اپنے اوپر سفید چارد تان رکھی ہو۔ یہاں کا ہر حصہ سبز درختوں اور برف کے ملے جلے مناظر پیش کررہا ہے۔

العربیہ نیٹ کے مطابق المندق پہاڑوں کی چوٹیاں،  کیاریاں اور شاہراہیں سبزہ زاروں اور برفباری کے باعث بے حد دلکش نظر آرہے ہیں۔

المندق میں موسم گرما کے دوران آب و ہوا معتدل رہتی ہے جبکہ موسم سرما میں برفباری کے باعث ٹھنڈ پڑتی ہے۔ المندق بارش کے حوالے سے مشہور ہے۔ بارش کے باعث خودرو گھاس اور پودے پہاڑوں اور میدانی علاقوں میں دلکش مناظر پیش کرتے ہیں۔ 

المندق وادیوں سے مالا مال ہے۔ یہاں بارش کا پانی محفوظ ہوجاتا ہے۔ موسم گرما میں انتہائی درجہ حرارت 30 سینٹی گریڈ سے آگے نہیں جاتا۔ موسم سرما کے دوران المندق کے بیشتر علاقوں پر دھند چھائی رہتی ہے اور درجہ حرارت منفی ہوجاتا ہے۔