سعودی عرب میں برفباری کے ناقابل یقین مناظر

شام، فلسطین، لبنان  اور اردن  میں سردی کی زبردست لہر آئی ہوئی ہے جبکہ ان ممالک میں برفانی طوفان کے اثرات سعودی عرب تک پہنچ گئے ہیں-

العربیہ کے مطابق چاروں ملکوں کو اپنی لپیٹ میں لینے والے برفانی طوفان کو ’جویس‘ کا نام دیا گیا ہے- یہ گذشتہ برسوں کے دوران آنے والا سب سے بڑا برفانی طوفان ہے- اس کے ساتھ گرج چمک اور موسلا دھار بارشیں ہورہی ہیں- برفباری کا سلسلہ  چل رہا ہے اور سیلاب بھی آ رہا ہے- برفباری 1100 میٹر تک پہنچنے کا امکان ہے-

سعودی عرب میں ناقابل یقین مناظر دیکھنے میں آ رہے ہیں- دنیا بھر میں اونٹوں کو صحرائی سفینہ کہا جاتا ہے-  اونٹوں پر برفباری سے سفید تہہ جم گئی ہے- تبوک کے مشرق اور مغرب میں اونٹوں پر برف کی تہہ کے  مناظر عام ہو گئے ہیں-

مقامی شہریوں نے سوشل میڈیا پر برفباری کے مناظر پر مشتمل ویڈیو کلپس پھیلا دیے- جن میں نظر آرہا ہے کہ شمالی سعودی عرب پر زبردست برفباری ہو رہی ہے- بیٹھے ہوئے اونٹوں پر برف کی تہہ جمی ہوئی ہے-

ایک اور ویڈیو کلپ کا تعلق تبوک کی شمال مغربی تحصیل علقان  سے ہے- جہاں زبردست برفباری کے مناظر دیکھے جا سکتے ہیں-

ماہرین موسمیات کا کہنا ہے کہ تیز ہواؤں اور موسلا دھار بارشوں کے ساتھ ’جویس‘ کا سلسلہ جمعے تک جاری رہے گا-

اس سے قبل ماہر موسمیات حسن کرانی  نے ٹوئٹر پر بتایا کہ سعودی عرب کے شمال مغربی علاقوں، ساحلوں اور حدود شمالیہ میں برفباری کا سلسلہ  آئندہ بدھ تک جاری رہے گا-

کرانی نے مزید بتایا کہ طریف اور القریات میں بھی برفباری ہوگی جبکہ مصر بھی اس کی زد میں ہوگا- سب لوگ شدید سردی کی لہر سے بچنے کے لیے گرم ملبوسات کا استعمال کریں-

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں