جدہ کورنیش پر لگژری رہائشی ٹاور بنانے کا معاہدہ

سعودی رئیل سٹیٹ ڈویلپمنٹ کمپنی دارالأركان اور سناسکو نے جدہ کورنیش پر لگژری رہائشی ٹاور بنانے کا منصوبہ بنایا ہے۔

عرب نیوز کے مطابق دونوں کمپنیوں نے پیر کو لگژری پراپرٹی مارکیٹ پر مرکوز مشترکہ منصوبے کے معاہدے پر دستخط کیے ہیں۔ منصوبے کی قدر ظاہر نہیں کی گئی تھی۔

اس ٹاور میں 300 اپارٹمنٹس ہوں گے جو براہ راست بحیرہ احمر کو نظر انداز کر رہے ہیں جبکہ اس منصوبے پر رواں سال کی چوتھی سہ ماہی میں کام شروع ہونے کی امید ہے۔

دار الأركان پراپرٹیز کے چیئرمین یوسف الشلاش نے کہا کہ ’اس منصوبے سے مغربی خطے خاص طور پر جدہ کی ترقی اور نمو پر توجہ دینے کے لیے ہماری نئی سٹریٹیجک سمت کو تقویت ملی ہے`۔

سعودی عرب کے ساحلی شہر جدہ میں واقع جدہ کورنیش مقامی شہریوں اور غیر ملکیوں میں بہت مقبول تفریحی مقام ہے۔

جدہ کورنیش پر واقع واکنگ ٹریک پر بھی کافی لوگ جاگنگ اور ورزش کرنے آتے ہیں جبکہ بیشتر افراد وہاں سائیکلنگ بھی کرتے ہیں۔

دار الأركان پراپرٹیز نے تقریباً 15 ہزار رہائشی یونٹ اور پانچ لاکھ مربع میٹر سے زیادہ تجارتی جگہ فراہم کی ہے۔

1994 میں قائم ہونے والی دار الأركان پراپرٹیز کا صدر دفتر ریاض میں ہے اور اس نے مملکت میں 30 سے زیادہ تجارتی، رہائشی اور رئیل سٹیٹ منصوبوں کی ترقی میں حصہ لیا ہے۔

واضح رہے کہ سعودی رئیل سٹیٹ ڈویلپمنٹ  کمپنی دار الأركان نے رواں سال مارچ میں مکہ مکرمہ کے دِل میں دار المشاعر منصوبہ نامی  نئی پرائم سٹیٹ ڈویلپمنٹ کے لانچ کا اعلان کیا تھا۔

عرب نیوز کے مطابق نیا دار المشاعر منصوبہ سات ٹاورز پر مشتمل ہے جس میں چھ ہزار 300 مربع میٹر کے دو، تین اور چار بیڈ روم والے اپارٹمنٹس،چھ پینٹ ہاؤسز اور ایک نجی سوئمنگ پول کا احاطہ کیا گیا ہے۔