مسجد عرفات کے خطیب شیخ بلیلہ کون ہیں؟ 

اس سال میدان عرفات سے حج کا خطبہ ممتاز عالم دین شیخ ڈاکٹر بندر بلیلہ دیں گے-  

خادم حرمین شریفین شاہ سلمان بن عبدالعزیز نے خطبہ حج کے لیے شیخ ڈاکٹر بندر بلیلہ کو منظوری دے دی ہے-  

 الوطن اخبار کے مطابق شیخ ڈاکٹر بندر بلیلہ کے کئی اعزاز ہیں- وہ مسجد الحرام مکہ مکرمہ کے امام و خطیب ہیں- طائف یونیورسٹی کے معاون پروفیسر اور اسلامی علوم کے ماہر ہیں-

شیخ بندر بلیلہ  1395ھ مطابق  1975 کو مکہ میں پیدا ہوئے- ابتدائی تعلیم سے لے کر ایم فل تک تمام تعلیمی مراحل مکہ ہی میں مکمل کیے- 

ام القری یونیورسٹی مکہ مکرمہ سے ’بی اے‘ علوم الشرعیہ اور اسلامک سٹڈیز فیکلٹی سے ایم فل کیا-

انہوں نے مدینہ منورہ کی اسلامی یونیورسٹی سے 1429ھ میں پی ایچ ڈی کی ڈگری حاصل کی-  

ڈاکٹر بندر بلیلہ کا شمار مشہور قرا میں بھی ہوتا ہے- وہ سعودی عرب کے ممتاز علما بورڈ کے ممبر بھی ہیں- 

شیخ بندر بلیلہ 4 ذی الحجہ 1434ھ کو مسجد الحرام کے باقاعدہ امام تعینات ہوئے تھے- وہ طائف یونیورسٹی میں معاون پروفیسر کی حیثیت سے کام کررہے ہیں جبکہ حرم شریف کے امام وخطیب بھی ہیں-