کورونا کے ایک ہزار 293 نئے کیسز، ریاض ریجن میں سب سے زیادہ مریض

سعودی عرب میں پیر 19 جولائی کو کورونا کے ایک ہزار سے زیادہ نئے کیسز سامنے آئے ہیں جبکہ کورونا کے مجموعی متاثرین کی تعداد پانچ لاکھ سے بڑھ گئی ہے۔ 

پیر کو سبق نیوز نے وزارت صحت کی جانب سے جاری بیان کے حوالے سے بتایا کہ ’گذشتہ 24 گھنٹوں کے دوران کورونا کے ایک ہزار 293 نئے مریض سامنے آئے جبکہ  ایک ہزار 453 افراد صحت یاب بھی ہوئے۔‘

وزرات صحت کے مطابق ’گذشتہ 24 گھنٹوں کے دوران کورونا کے مزید 14 مریض چل بسے، جس کے بعد مرنے والوں کی مجموعی تعداد بڑھ کر 8 ہزار 89 ہو گئی ہے۔‘

وزارت کا کہنا ہے کہ ’مملکت میں کورونا کے فعال کیسز کی تعداد 10 ہزار 631 ہو گئی ہے، جن میں سے ایک ہزار 403 مریضوں کی حالت نازک ہے جو انتہائی نگہداشت کے یونٹس میں زیرعلاج ہیں۔‘

وزارت صحت کی جانب سے جاری ہونے والے اعداد و شمار کے مطابق ’سب سے زیادہ مریض ریاض ریجن میں سامنے آئے، جن کی تعداد 316 ہے جبکہ مکہ ریجن میں 262 افراد میں وائرس کی تصدیق ہوئی۔‘

الشرقیہ ریجن میں 219، عسیر ریجن میں 129، جازان ریجن میں 79، القصیم ریجن میں 60، مدینہ ریجن میں 62، حائل ریجن میں 64، نجران ریجن میں 33، الباحہ ریجن میں 25، تبوک ریجن میں 22، الحدود الشمالیہ میں 17 اور الجوف ریجن میں 5 مریض سامنے آ ئے ہیں۔

اب تک پانچ لاکھ 10 ہزار 869 افراد میں کورونا وائرس کی تصدیق ہو چکی ہے جن میں سے چار لاکھ 92 ہزار 149 افراد شفایاب بھی ہوئے ہیں۔

وزارت صحت کا کہنا ہے کہ ’کورونا سے بچاؤ کے لیے مقررہ احتیاطی تدابیر پر عمل کرنا ضروری ہے، جن میں سماجی فاصلے کا اصول انتہائی اہم ہے۔‘