Sorry, you need to enable JavaScript to visit this website.

 ویکسین کی تیسری خوراک کے لیے نئے زمروں کا اضافہ کیا جا سکتا ہے

ترجمان کا کہنا ہے کہ جو بھی فیصلہ ہوگا اس کا اعلان کیا جائے گا۔( فائل فوٹو اے ایف پی)
سعودی وزارت صحت کے ترجمان ڈاکٹر محمد العبد العالی نے کہا ہے کہ آئندہ مرحلے میں کورونا ویکسین کی تیسری خوراک کے لیے نئے زمروں کا اضافہ کیا جا سکتا ہے۔
سعودی چینل کے مطابق وزارت صحت کے ترجمان نے کہا کہ مملکت نے مخصوص زمروں میں شامل افراد کے لیے بوسٹر خوراک کا انتظام کیا ہے۔
طبی جائزوں سے یہ بات ثابت ہوگئی تھی کہ گردے کے پرانے مریض یا اعضا کی پیوند کاری کرانے والوں کو دو خوراکیں لینے کے بعد بوسٹر کی ضرورت ہوتی ہے۔
وزارت صحت کے ترجمان نے کہا کہ وزارت صحت 60 برس یا اس سے زیادہ عمر کے ایسے لوگوں کو ویکسین کی تیسری خوراک فراہم کرنے کی تیاری کررہی ہے جو دوسری خوراک 8 ماہ قبل لے چکے ہیں۔
ڈاکٹر العبد العالی نے ویکسین کی تیسری خوراک رضاکارانہ طور پر لینے کے امکان کے حوالے سے کہا کہ آئندہ مرحلے میں دیگر زمروں کو بھی تیسری خوراک کے دائرے میں لایا جاسکتا ہے۔ اس حوالے سے جو بھی فیصلہ ہوگا پہلی فرصت میں اس کا اعلان کر دیا جائے گا۔

 

شیئر: