Sorry, you need to enable JavaScript to visit this website.

سعودی عرب میں بارش کے موسم کا آغاز ہفتے سے

’آج سے ریاض، قصیم، شمالی اور مشرقی ریجنوں میں مطلع غبار آلود ہوگا‘ (فوٹو: طقس العرب)
سعودی عرب میں گرج چمک کے ساتھ موسلادھار بارش کے موسم کا آغاز ہفتے سے ہوگا۔
یہ بات قصیم یونیورسٹی میں موسمیات کے سابق پروفیسر اور ماہر موسمیات ڈاکٹر عبد اللہ المسند نے کہی ہے۔
سبق ویب سائٹ کے مطابق انہوں نے کہا ہے کہ ’بارش کے موسم کے آغاز سے پہلے اور اختتام پر تبوک، الجوف، حائل اور مدینہ منورہ کے علاوہ مکہ مکرمہ کے بعض علاقوں میں درمیانے درجے کی بارش ہوگی‘۔
’جبکہ شمالی، وسطی اور مغربی علاقوں میں بھی اس کے اثرات ظاہر ہونا شروع ہوں گے‘۔
انہوں نے کہا ہے کہ ’آج سے ریاض، قصیم، شمالی اور مشرقی ریجنوں میں مطلع غبار آلود ہوگا‘۔
’اس کے ساتھ عسیر اور باحہ کے علاوہ عام طور پر جنوب کے بالائی علاقوں میں گرج چمک کے ساتھ بارش ہوگی‘۔
دوسری طرف محکمہ موسمیات نے کہا ہے کہ ’جازان، عسیر اور باحہ کے علاوہ مکہ مکرمہ کے بالائی علاقوں میں غبار آلود ہوا چلے گی جبکہ بحیرہ احمر کے ساحلی علاقوں میں دھند رہے گی‘۔

’بارش کے موسم کے آغاز سے پہلے اور اختتام پر متعدد علاقوں میں درمیانے درجے کی بارش ہوگی‘ (فوٹو: طقس العرب)

محکمہ موسمیات نے کہا ہے کہ ’دھند کی کیفیت مشرقی ریجن، مکہ مکرمہ، مدینہ منورہ، جازان، عسیر، باحہ اور تبوک میں ہوگی‘۔
’مکہ مکرمہ ریجن میں سب سے زیادہ شفا، طائف، ہدا، میسان، جدہ، ثول،رابغ اور القنفذہ دھند کی لپیٹ میں ہوں گے‘۔
’اسی طرح مدینہ منورہ ریجن میں الرایس اور ینبع میں سب سے زیادہ دھند چھائی رہے گی‘۔

شیئر: