پاکستان کے سب سے بڑے شہر کراچی میں سٹریٹ کرائم سے متعلق ویڈیوز اور تصاویر ماضی میں شئیر ہوتی رہی ہیں تاہم حالیہ دنوں میں سوشل ٹائم لائنز پر ایسے مواد میں بہت زیادہ اضافہ دیکھا گیا ہے۔
فیس بک، ٹوئٹر سمیت سوشل پلیٹ فارمز پر کراچی میں جرائم سے متعلق مناظر کی کثرت کو بہت سے مقامی افراد جرائم میں اضافے کی علامت قرار دیتے ہیں۔
منگل کے روز ایسی ہی ایک ویڈیو سوشل میڈیا پر وائرل ہوئی ہے جسے شیئر کرنے والوں کے مطابق ’گھر کے اندر موجود شہری کو ڈاکو لوٹ گئے ہیں۔‘
ویڈیو شیئر کرنے والے سید فیصل حسین نے اسے کراچی کے علاقے سعود آباد میں ہونے والی ڈکیتی بتایا ہے۔
ایک منٹ سے زائد دورانیے کی ویڈیو پر درج تاریخ اور وقت کے مطابق واقعہ پیر 28 فروری کو دن ساڑھے بجے پیش آیا ہے۔
لٹیروں کی ہمت اور شہری کی بے بسی دیکھیں pic.twitter.com/2SUa1sAAYf
— Syed Faisal Hussain (@sfaisal_hussain) March 1, 2022
ویڈیو پر تبصرہ کرنے والے متعدد افراد نے پیپلزپارٹی رہنما اور کراچی کے ایڈمنسٹریٹر مرتضی وہاب کو مینشن کیا تو ان سے پوچھا کہ کیا یہ ڈرامے کی شوٹنگ ہو رہی ہے؟
’کیا کوئی امن عامہ کی بگڑتی صورتحال کو دیکھ رہا ہے‘ لکھتے ہوئے متحدہ عرب امارات میں مقیم پاکستانی شہری مہوش اعجاز نے اسے ’نیا دن اور کراچی میں ایک اور خوفناک واقعہ‘ سے تعبیر کیا۔
شہر میں مسلسل جرائم پر تبصرہ کرنے والوں نے سندھ کی حکمراں جماعت پیپلزپارٹی کی قیادت کو مینشن کرتے ہوئے طنز کیا تو لکھا کہ ’سندھ میں امن عامہ کی بہترین صورتحال پر شکریہ۔‘
