وینزویلا کے صدر کی نائیکی ٹریک سوٹ میں تصویر وائرل، لباس مارکیٹ سے آؤٹ آف سٹاک

امریکہ کے وینیزویلا پر حملے اور صدر نکولس مادورو کی گرفتاری کے بعد مشہور برینڈ ’نائیکی‘ کا نائیکی ٹک ٹریک سوٹ آؤٹ آف سٹاک ہو گیا ہے۔

متعدد آن لائن پلیٹ فارمز نے انکشاف کیا ہے کہ ٹریک سوٹس کی مانگ میں اچانک نمایاں اضافہ دیکھنے میں آیا ہے جس کی وجہ وینزویلا کے صدر نکولس مادورو کی وہ تصاویر بنی ہیں جو امریکی افواج کی جانب سے ان کی حراست کے بعد سامنے آئیں۔‘

اس سے قبل امریکی صدر ڈونلڈ ٹرمپ نے ایک تصویر سوشل میڈیا پر شیئر کی جس میں وینزویلا کے صدر کو ایک جہاز پر آنکھوں پر پٹی باندھے اور ہتھکڑیاں لگے ہوئے دیکھا جا سکتا ہے۔ اس تصویر میں نکولس مادورو نے سرمئی رنگ کا نائیکی کا ٹریک سوٹ پہن رکھا تھا۔

رپورٹس کے مطابق سنیچر کو نکولس مادورو کو علی الصبح ایک کارروائی کے دوران اس وقت حراست میں لیا گیا جب وہ سو رہے تھے، اور ابتدائی طور پر وہ عام گھریلو لباس میں نظر آئے تھے۔ تاہم بعد میں سامنے آنے والی تصاویر میں انہوں نے نائیکی کا ٹریک سوٹ پہن رکھا تھا جو خاص توجہ کا مرکز بن گیا۔

نکولس مادورو کی گرفتاری اور امریکی کارروائی پر وینزویلا سمیت عالمی سطح پر ملا جلا ردِعمل دیکھنے میں آیا، مگر ان کے لباس نے ٹک ٹاک اور انسٹاگرام پر میمز اور ویڈیوز کی شکل میں غیرمعمولی مقبولیت حاصل کی۔

گوگل ٹرینڈز کے مطابق تصاویر کے منظرِ عام پر آنے کے فوراً بعد ’نائیک ٹک‘ کی سرچز میں نمایاں اضافہ ہوا، جبکہ سرمئی ٹریک سوٹ کے سکرین شاٹس اور لنکس تیزی سے مختلف سوشل میڈیا پلیٹ فارمز پر پھیلتے رہے۔

ریٹیلرز کے مطابق نکولس مادورو کا سرمئی نائیک ٹیک فلیس ٹریک سوٹ عموماً مارکیٹ اور ماڈل کے لحاظ سے 240 سے 270 امریکی ڈالر میں فروخت ہوتا ہے، تاہم تصاویر وائرل ہونے کے چند ہی گھنٹوں میں کئی آن لائن لسٹنگز سٹاک ختم ہونے کے باعث دستیاب نہ رہیں۔