حکومت کا ہفتہ وار دو چھٹیاں بحال کرنے کا فیصلہ

پاکستان کی وفاقی حکومت نے وفاق میں ہفتہ وار دو چھٹیاں بحال کرنے کا فیصلہ کر لیا ہے جس کی منظوری منگل کو ہونے والے وفاقی کابینہ کے اجلاس میں دی جائے گی۔ 

حکام کے مطابق ہفتے کے دن کی چھٹی بحال کرنے کا فیصلہ وزارت توانائی کی تجویز پر کیا جا رہا ہے جس کی بنیادی وجہ توانائی کی بچت کرنا ہے اور اسی تناظر میں چھٹی بحالی کی جا رہی ہے۔

چھٹی کی حتمی منظوری کا فیصلہ کل کابینہ اجلاس میں ہوگا، وفاقی کابینہ کا اجلاس کل طلب کیا گیا ہے۔

وزیراعظم شہباز شریف نے حلف اٹھانے کے بعد پہلے دن ہی ہفتے میں دو سرکاری تعطیلات ختم کرکے صرف ایک چھٹی کرنےکا اعلان کیا تھا۔

ان کا کہنا تھا کہ پاکستان غریب ملک ہے اور ہفتے میں چھٹیوں کا متحمل نہیں ہوسکتا۔ 

امید کی جا رہی تھی کہ رمضان کے فوری بعد دو چھٹیاں بحال ہو جائیں گی لیکن عیدالفطر کی چھٹیوں کے فوری بعد سرکاری اوقات کا نیا شیڈول جاری کیا گیا جس میں ہفتے کی چھٹی برقرار رکھی گئی۔ 

خیال رہے کہ سرکاری ملازمین کی جانب سے حکومت سے مسلسل مطالبہ کیا جا رہا تھا کہ ہفتے کی چھٹی بحال کی جائے۔ حکومت کی جانب سے ان کا مطالبہ وقتی طور پر منظور کیا گیا ہے تاہم یہ واضح نہیں ہے کہ موسم میں تبدیلی کے بعد بھی ہفتے کی چھٹی برقرار رہے گی یا نہیں۔