عراق سے سعودی لڑکی کی فضائی ایمبولنس کے ذریعے منتقلی

عراق میں موجود سعودی لڑکی سارہ الشمری کو اچانک طبعیت خراب ہونے پر منگل کو فضائی ایمبولنس کے ذریعے سعودی عرب منتقل کیا گیا ہے۔

بغداد میں سعودی سفارتخانے نے بیان میں کہا کہ’ سارہ الشمری اپنی فیملی کے ہمراہ عراق میں تھی، اس کی صحت اچانک خراب ہوگئی۔ وزارت صحت نےعراقی کردستان کے اربیل ایئرپورٹ پر فضائی ایمبولینس بھیج کرعلاج کے  لیے مملکت منتقل کیا ہے‘۔

سفارتخانے نے ٹوئٹر پر بیان میں کہا کہ’ صحت کے حوالے سے سعودی لڑکی کی صورتحال سنگین تھی۔ فضائی ایمبولینس کے ذریعے علاج کے لیے سعودی عرب منتقل کیے جانا ضروری تھا‘۔

یاد رہے کہ سعودی وزارت صحت بیرون مملکت موجود سعودی شہریوں کو نازک صورتحال سے دوچار ہونے کی صورت میں فوری صحت خدمات فراہم کرتی ہے۔ ضرورت پڑنے پر انہیں فضائی ایمبولینس کے ذریعے مملکت لانے کا انتظام کیا جاتا ہے۔