ینبع میں طوفانی بارش کے بعد سیلابی ریلے کے سمندر میں گرنے کا منظر

سعودی عرب کے علاقے ینبع میں طوفانی بارش کے بعد آنے والے سیلاب کے مناظر کی وڈیو سوشل میڈیا پر وائرل ہے۔

العربیہ نیٹ کے مطابق فوٹو گرافر اسامہ الحربی جنہوں نے ینبع میں سیلاب کے مناظر کی فوٹو گرافی کی کہا کہ ’ینبع میں تباہ کن بارش ہوئی ہے‘۔

 فضا سے لی جانے والی تصاویر میں الشبعان کےعلاقے میں سیلابی ریلا دیکھا جا سکتا ہے۔

اسامہ الحربی نے بتایا کہ’ سیلابی ریلا سمندر میں اس انداز سے گر رہا ہے جس کی نظر نہیں ملتی۔ اس کا اظہار الفاظ میں نہیں کیا جا سکتا‘۔

انہوں نے مزید کہا کہ’ منگل کو ینبع اور اس کی تحصیلوں میں موسلا دھار بارش نے سیلاب کی شکل اختیار کرلی‘۔ 

یاد رہے کہ محکمہ شہری دفاع نے بارش کے پیش نظرشہریوں اور مقیم غیرملکیوں سے احتیاطی تدابیر اختیار کرنے کی اپیل کی تھی۔

محکمہ شہری دفاع کا یہ بھی کہنا تھا کہ’ موسمیات کے قومی مرکز کی رپورٹ کے مطابق مکہ مکرمہ، مدینہ منورہ، ینبع، حدود شمالیہ، تبوک، الجوف اور حائل میں  بارش کے باعث سیلاب کے قوی امکانات ہیں‘۔