عمران خان کے خلاف توہینِ الیکشن کمیشن کی کارروائی جاری رکھنے کی اجازت

سپریم کورٹ نے سابق وزیراعظم اور چیئرمین پاکستان تحریک انصاف عمران خان کے خلاف توہینِ الیکشن کمیشن کی کارروائی جاری رکھنے کی اجازت دے دی ہے۔

منگل کو اپنے فیصلے میں سپریم کورٹ نے کہا کہ ’الیکشن کمیشن عمران خان، فواد چوہدری اور اسد عمر کے خلاف کارروائی جاری رکھے۔ الیکشن کمیشن تحریک انصاف کے اعتراضات پر بھی قانون کے مطابق فیصلہ کرے۔‘

عدالت نے ریمارکس دیے کہ کسی ہائی کورٹ نے الیکشن کمیشن کو کارروائی سے نہیں روکا، سندھ اور لاہور ہائی کورٹس نے صرف حتمی فیصلہ جاری کرنے سے روکا ہے۔

فیصلے میں کہا گیا ہے کہ ’الیکشن ایکٹ کمیشن کو کارروائی کے لیے بااختیار بناتا ہے، تحریک انصاف نے کارروائی کا اختیار دینے کی دفعہ چیلنج کر رکھی ہے۔ رائج قانون چیلنج ہو تو بھی اس پر عمل درآمد سے روکا نہیں جا سکتا۔‘

الیکشن کمیشن نے ہائی کورٹس کی جانب سے دیے گئے حکم امتناع سپریم کورٹ میں چیلنج کیے تھے۔

الیکشن کمیشن نے عمران خان ،اسد عمر اور فواد چوہدری کی جانب سے منظم تضحیک آمیز مہم چلانے کے معاملے پر چیئرمین پاکستان تحریک انصاف کے خلاف سپریم کورٹ سے رجوع کیا تھا۔

الیکشن کمیشن کی جانب سے سپریم کورٹ میں دائر کی گئی درخواست میں موقف اختیار کیا گیا تھا کہ ’الیکشن کمیشن نے اگست اور ستمبر میں عمران خان، فواد چوہدری اور اسد عمر کے خلاف توہین عدالت کی کارروائی کے نوٹسز جاری کیے۔ عمران خان اور دیگر فریقین نے توہین عدالت کے نوٹسز کو مختلف ہائی کورٹس میں چیلنج کر دیا۔ الیکشن ایکٹ کے تحت الیکشن کمیشن کو توہین پر کارروائی کا اختیار حاصل ہے۔‘