ولی عہد شہزادہ محمد بن سلمان کو چاڈ کے عبوری صدر کا پیغام موصول

سعودی ولی عہد و وزیراعظم شہزادہ محمد بن سلمان کو جمہوریہ چاڈ کے عبوری صدر محمد ادریس دبی اتنو کا اتوار کو زبانی پیغام موصول ہوا ہے جس میں دونوں ملکوں اور برادر عوام کے درمیان تعلقات اور مشترکہ تعاون کےاستحکام کے طریقوں کا ذکر ہے۔ 

سرکاری خبررساں ادارے ایس پی اے کے مطابق وزیر خارجہ شہزادہ فیصل بن فرحان سے وزیر مملکت برائے امور خارجہ محمد صالح النظیف نے ملاقات کی اور چاڈ کے صدر کا زبانی پیغام دیا۔

اس موقع پر چاڈ اور مملکت کے باہمی تعلقات اور مشترکہ مفادات کے حصول میں معاون طریقوں کا جائزہ لیا گیا۔ باہمی دلچسپی کے علاقائی و بین الاقوامی مسائل پر نقطہ ہائے نظر پربھی تبادلہ خیال کیا گیا۔ 

اس موقع پر معاون وزیر مملکت برائے امور افریقی ممالک ڈاکٹر سامی الصالح اور چاڈ  میں متعین سعودی سفییر عامر الشھری بھی موجود  تھے۔