غلط پارکنگ پر کارتک کا چالان، ’بھول کر بھی نہ سوچیں’شہزادے‘ قوانین توڑ سکتے ہیں‘

بالی وُڈ اداکار کارتک آریان کو غلط جگہ کار پارک کرنے کے باعث چالان کر دیا گیا۔

ہندوستان ٹائمز کے مطابق جمعے کے روز ممبئی ٹریفک پولیس نے کارتک آریان کو ’نو پارکنگ زون‘ میں کار کھڑی کرنے پر چالان کیا۔

کارتک آریان والدین کے ساتھ اپنی فلم ’شہزادہ‘ کی ریلیز سے پہلے ممبئی کے ایک مندر میں عبادت کے لیے گئے جہاں پر انہوں نے ممنوعہ جگہ پر کار پارک کی جس کے بعد پولیس نے انہیں چالان کر دیا۔

سماجی رابطوں کی ویب سائٹ ٹوئٹر پر ممبئی ٹریفک پولیس کی جانب سے اس واقعے پر ایک دلچسپ ٹویٹ کیا گیا جس میں انہوں نے کارتک آریان کی کار کی تصویر شیئر کرتے ہوئے فلم ’بھول بھلیا 2‘ اور ’شہزادہ‘ پر طنز کیا۔

 پولیس نے اپنی ٹویٹ میں کہا کہ ’پرابلم؟ پرابلم یہ تھی کہ کار غلط جگہ پر پارک ہوئی تھی۔ یہ بات ’بھول‘ کر بھی نہ سوچیں کہ ’شہزادے‘ ٹریفک کے قوانین کو توڑ سکتے ہیں۔‘

پولیس حکام کی جانب سے گاڑی کے نمبر پلیٹ کو چھپا دیا گیا جبکہ چالان کی رقم کا بھی نہیں بتایا گیا تاہم ایک پولیس افسر نے کہا کہ ’جس کی بھی گاڑی ہو، بے شک وہ اداکار ہو، اگر وہ غلط جگہ پر پارک ہوگی تو پولیس اپنا کام کرے گی۔‘

دوسری جانب کارتک آریان اور کریتی سینن کی فلم ’شہزادہ‘ نے اپنی ریلیز کے پہلے دن باکس آفس پر مایوس کن کارکردگی کا مظاہرہ کرتے ہوئے انڈیا بھر سے صرف 6 کروڑ روپے کمائے ہیں۔

شہزادہ جنوبی انڈیا کے سپر سٹار اَلو ارجن کی 2019 میں ریلیز ہونے تیلگو فلم 'الا وائکنتھاپرمالو' کا ہندی ریمیک ہے۔

یہ فلم کارتک آریان اور کریتی سینن کی ایک ساتھ دوسری فلم ہے۔ اس سے پہلے دونوں سپر سٹارز 2019 میں ریلیز ہونے والی فلم 'لکا چھپی‘ میں ایک ساتھ نظر آئے تھے۔

خیال رہے اس فلم سے قبل کارتک آریان کی بلاک بسٹر فلم 'بھول بھلیا 2' گزشتہ سال مئی میں ریلیز ہوئی تھی۔