چکن منچورین پاکستانی ہے یا انڈین؟ سوشل میڈیا پر بحث

چکن منچورین دنیا بھر میں کھائے جانی والی ہر دلعزیز ڈِش ہے۔

چکن منچورین جب بن کر سامنے آئے تو اُسے نہ چھکنا بہت مشکل کام بن جاتا ہے۔

اِس ڈِش کے بارے میں سماجی رابطوں کی ویب سائٹ ٹوئٹر پر پاکستانی اور انڈین صارفین کے درمیان دلچسپ نوک جھوک دیکھنے میں آ رہی ہے۔

امریکہ اخبار دی نیو یارک ٹائمز نے ٹوئٹر پر چکن منچورین کے بارے میں کوکنگ آرٹیکل شیئر کیا گیا جس میں اسے پاکستانی ڈِش کہا گیا ہے۔

نیو یارک ٹائمز نے اپنی ٹویٹ میں لکھا کہ ’یہ پاکستانی چائینیز کھانوں کا شہنشاہ، چکن منچورین جنوبی ایشیا میں چینی ریستورانوں پر بہت مقبول ہے۔‘

نیو یارک ٹائمز کے کوکنگ آرٹیکل میں نامہ نگار زینب شاہ لکھتی ہیں کہ ’یہ پاکستانی چینی کھانوں کا شہنشاہ، چکن منچورین جنوبی ایشیا میں چینی ریستورانوں پر بہت مقبول ہے۔ یہ ڈش 90 کی دہائی میں پاکستان کے شہر لاہور میں واقع سِن کانگ ریستوران میں کئی مرتبہ بنانے کے بعد آیا۔‘

نیو یارک ٹائمز کی نامہ نگار زینب شاہ کی اس ریسیپی اور آرٹیکل کے بعد ٹوئٹر پر نئی بحث نے جنم لیا ہے جس میں انڈین صارفین کی جانب سے دعویٰ کیا جا رہا ہے کہ چکن منچورین انڈیا کی ایجاد ہے۔

انڈین ویب سائٹ ویون کا کہنا ہے 2017 میں شائع ہونے والی ساؤتھ چائنہ مارننگ پوسٹ کے مطابق چکن منچورین چینی نژاد انڈین شیف نیلسن وانگ کی ایجاد ہے جو کلکتہ میں پیدا ہوئے اور اُن کے ریستوران ممبئی میں ہیں۔ نیلسن وانگ ممبئی کے کرکٹ کلب آف انڈیا (سی سی آئی) میں شیف تھے۔ انہوں نے چائنہ گارڈن میں 1983 میں اپنا ریستوران کھولا اور اب اُن کے یہ ریستوران انڈیا اور نیپال بھر میں ہیں۔

اسی سلسلے میں نیمو اپنی ٹویٹ میں کہتے ہیں کہ ’معافی چاہتا ہوں۔ چکن منچورین کو نیلسن وانگ نے 1975 میں ایجاد کیا تھا۔‘

نیانیکا نے نیو یارک ٹائمز کی تصیح کرتے ہوئے لکھا کہ ’یہ انڈین چینی شیف نیلسن وانگ کی ایجاد ہے۔ وہ کلکتہ میں پیدا ہوئے تھے۔ اُن کے ریستوران ممبئی میں ہیں۔ یہ انڈین چینی کھانا ہے۔‘

ڈاکٹر بیٹ مین نے تنقیدی انداز میں کہا کہ ’نیو یارک ٹائمز؟ یہ تو کراچی ٹائمز زیادہ لگ رہا ہے۔ یہ ڈِش کلکتہ کی ایجاد ہے۔ آخری مرتبہ جب میں نے دیکھا تھا تو وہ انڈیا میں تھا۔‘

اشوک سوائن اپنی ٹویٹ میں کہتے ہیں کہ ’مجھے پتا ہے کہ پاکستان اور چین دوست ہیں لیکن چکن منچورین انڈین ہے۔‘

ڈاکٹر عائشہ رے نے تبصرہ کیا کہ ’نیو یارک ٹائمز یہ غلط ہے۔ چکن منچورین انڈیا کی ایجاد ہے جو شمال مشرقی، مشرقی اور انڈیا کے کچھ شمالی حصوں میں انڈیا اور چینی کھانوں کا ملاپ ہے۔ کلکتہ میں یہ بہت خاص سمجھا جاتا ہے کیونکہ وہاں چینی تارکینِ وطن لوگوں کی آبادی بہت ہے۔‘

کاویری نے دلچسپ انداز میں ٹویٹ کی کہ ’یہ ایک جھوٹ ہے۔ ہمیشہ کی طرح پاکستان اس چیز کو اپنا کہہ رہا ہے جو انڈیا کی ہے۔ چین اور امریکہ غیر ضروری طور پر شامل ہیں۔ میں جنگ کا اعلان کر رہی ہوں۔‘

سونیا سنگھ نے اس بارے میں بات کی کہ ’انڈیا اور پاکستان کو آج جس موضوع نے بھڑکایا ہے وہ ہے چکن منچورین۔‘

انڈین صارفین کے جواب میں پاکستانی صارفین کے بھی دلچسپ تبصرے دیکھنے میں آ رہے ہیں۔

مریم کہتی ہیں کہ ’انڈین اس سادہ سی ٹویٹ پر آگ بگولا ہو رہے ہیں کیونکہ اُنہیں آکسفورڈ کوما کی سمجھ نہیں آ رہی۔ ’یہ پاکستانی چینی کھانوں کا شہنشاہ، چکن منچورین۔ اس کا یہ مطلب نہیں ہے کہ پاکستان نے چکن منچورین کو ایجاد کیا۔ یہ صرف وہ منفرد رشتہ ہے جو ہمارے درمیان ہے۔‘

ٹوئٹر ہینڈل سن فلار موکی کوک سٹوڈیو کے بلاک بسٹر گانے ’پسوڑی‘ سے موازنہ کرتے ہوئے کہتی ہیں کہ ’پسوڑی جنوبی ایشیا کا گانا ہے لیکن چکن منچورین صرف انڈین ہے۔‘

کشف مزاحیہ انداز میں لکھتی ہیں کہ ’آپ کو یقین نہیں آئے گا لیکن پڑوسی اس پر بھی رو رہے ہیں۔‘

دانیال کہتے ہیں کہ ’لوگ چکن منچورین پر لڑ رہے ہیں۔ اس کا ذائقہ تو عام سا ہے۔‘

ٹوئٹر ہینڈل پیچ ٹی نے چکن منچورین کی جگہ چاؤمین کی تعریف کرتے ہوئے کہا کہ ’آپ سب لوگ چکن منچورین پر کیوں لڑ رہے ہو؟ اگر یہ چاؤمین ہوتا تب بھی یہ لڑائی سمجھ میں آتی لیکن یہ تو چکن منچورین ہے۔ کسی کو کیا پرواہ یہ پاکستان سے ہے یا انڈیا سے۔ یہ صرف کیچپ ہے۔‘