بنگلہ دیشی ملازم کی شادی میں سعودی فیملی باراتی، بغیر پرمٹ مکہ میں داخلے پر پابندی سمیت گزشتہ ہفتے سعودی عرب کی اہم خبریں
بنگلہ دیشی ملازم کی شادی میں سعودی فیملی باراتی، بغیر پرمٹ مکہ میں داخلے پر پابندی سمیت گزشتہ ہفتے سعودی عرب کی اہم خبریں
اتوار 21 مئی 2023 0:06
سوشل ڈیسک -اردو نیوز
گذشتہ ہفتے سعودی عرب میں سعودی خاندان کی بنگلہ دیشی کارکن کی شادی میں شرکت، غیر ملکیوں پر بغیر پرمٹ مکہ میں داخل ہونے پر پابندی، مکہ میں لگنے والی آگ سے پاکستانی عمرہ زائرین کی ہلاکت، مکہ میں داخلے کے لیے پرمٹ کے آن لائن اجرا سمیت دیگر خبریں قارئین کی توجہ کا مرکز رہیں۔
بنگلہ دیشی گھریلو کارکن کی شادی، سعودی فیملی بارات لے کر گئی
سعودی فیملی کی جانب سے بنگلہ دیشی گھریلو کارکن کی بارات کی وڈیو سوشل میڈیا پر وائرل ہے۔
العربیہ نیٹ کے مطابق سعودی فیملی گھریلو کارکن ظہیر کی بارات اپنے گھر سے شادی ہال تک دھوم دھام کےساتھ لے کر گئے۔
بنگلہ دیشی دولہا شادی کے موقع پر پہنے جانے والے سعودی لباس میں تھا۔
مکہ کے راستے پر واقع چیک پوسٹوں پر پرمٹ چیک کیے جائیں گے۔ (فائل فوٹو: سبق)
حج سیزن: مقیم غیر ملکیوں پر بغیر پرمٹ مکہ جانے پر آج سے پابندی
سعودی محکمہ امن عامہ نے کہا ہے کہ ’ پیر 15 مئی 2023 سے مقیم غیرملکی اجازت نامے کے بغیر مکہ مکرمہ نہیں جاسکتے‘۔
سرکاری خبررساں ادارے ایس پی اے کے مطابق محکمہ امن عامہ نے اتوار کو بیان میں کہا کہ’ مکہ مکرمہ جانے کے خواہشمند مقیم غیرملکیوں کے حوالے سے حج سیزن کی ہدایات پر عمل درآمد شروع کیا جارہا ہے‘۔
مرنے والوں میں دو کا تعلق وہاڑی جبکہ دو کا تعلق قصور سے ہے۔ (فوٹو: محکمہ شہری دفاع)
مکہ کے ہوٹل میں آتشزدگی، آٹھ پاکستانی عمرہ زائرین ہلاک، چار کی شناخت
سعودی عرب میں مکہ کے ایک ہوٹل میں آتشزدگی کے ایک واقعے میں آٹھ پاکستانی عمرہ زائرین ہلاک جبکہ متعدد کے زخمی ہونے کی اطلاعات ہیں۔
پاکستان قونصلیٹ جدہ میں قونصل ویلفیئر شیراز علی خان نے اردو نیوز کو بتایا کہ ’مکہ میں ابراہیم خلیل روڈ پر واقع ایک ہوٹل میں آتشزدگی کا یہ واقعہ پیش آیا۔‘
قونصل ویلفیئر کے مطابق ’ابتدائی اطلاعات میں بتایا گیا ہے کہ آگ ہوٹل کی تیسری منزل پر شارٹ سرکٹ سے ایک کمرے میں لگی جس نے دیگر کمروں کو بھی اپنی لپیٹ میں لے لیا۔ آگ لگنے سے چار کمروں کو نقصان پہنچا۔‘
