’سفارتکاری میں پاکستان کا اہم مقام‘،کاکڑ کی چینی نائب صدر سے ملاقات

چین کے نائب صدر ہان ژینگ نے کہا ہے کہ پاکستان قریبی پڑوسی اور بھائی کی حیثیت سے چین کی سفارت کاری میں ایک خاص مقام رکھتا ہے۔

نیویارک میں اقوام متحدہ کی جنرل اسمبلی کے اجلاس کے موقع پر پاکستان کے نگراں وزیراعظم انوارالحق کاکڑ سے ملاقات میں نائب صدر ہان ژینگ نے کہا کہ پاکستان کی معاشی ترقی اور خوشحالی کے لیے کوششیں جاری رکھیں گے۔

وزیراعظم آفس کے ٹوئٹر اکاؤنٹ پر جاری اعلامیے میں کہا گیا ہے کہ جمعرات کو ہونے والی اس ملاقات میں دونوں رہنماؤں نے سی پیک منصوبوں کی پیش رفت پر اطمینان کا اظہار کیا اور باہمی دلچسپی کے دیگر امور پر بھی تبادلہ خیال کیا گیا۔

نگراں وزیراعظم انوارالحق کاکڑ نے بنیادی مسائل کے معاملے پر اورعلاقائی سلامتی، خودمختاری اور سماجی و اقتصادی ترقی کے لیے چین کی حمایت کو سراہا۔

اس موقع پر نگراں وزیراعظم کا کہنا تھا کہ ’کشمیر کے متنازع علاقے میں جی20 کے کسی بھی اجلاس کے انعقاد کی چین کی جانب سے مخالفت بین الاقوامی قوانین اور اقوام متحدہ کی قراردادوں کی پاسداری ہے۔‘

ان کے مطابق ’یہ طرزعمل چین کے اصول موقف کا عکاس ہے۔‘

چینی نائب صدر ہان ژینگ نے اس موقع پر کہا کہ پاکستان اور چین کی دوستی بے مثال ہے اور دونوں ممالک کے عوام کے درمیان گہرے تعلقات کی بدولت ہر موقع پر ثابت قدم رہی ہے۔

’قریبی پڑوسی اور بھائی کی حیثیت سے پاکستان چین کی سفارت کاری میں ایک خاص مقام رکھتا ہے اور چین پاکستان کی معاشی ترقی اور خوشحالی کے لیے کوششیں جاری رکھے گا۔‘

پاکستان میں سی پیک منصوبوں پر ہونے والی پیش رفت پر دونوں رہنماؤں نے اطمینان کا اظہار کرتے ہوئے مل کر کام جاری رکھنے کے پختہ عزم کا اظہار بھی کیا۔

دونوں رہنماؤں کی جانب سے سی پیک کی 10ویں سالگرہ کے موقع پر دونوں ممالک میں ہونے والی تقاریب پر بھی اطمینان کا اظہار کیا گیا۔

نگراں وزیراعظم نے چینی نائب صدر کو پاکستان کے دورے کی دعوت بھی دی جو انہوں نے قبول کر لی۔