ٹائیفائیڈ میری: جنہیں ٹائیفائیڈ نہیں ہوا لیکن ’بیماری کی فیکٹری‘ تھیں

یہ سن 1906 کی بات ہے۔ نیویارک میں لانگ آئی لینڈ کے اویسٹر بے میں امیر کبیر خاندان کے 11 افراد گرمیوں کی چھٹیاں منانے جاتے ہیں اور ان میں سے چھ لوگ بیمار پڑ جاتے ہیں۔ ان میں ٹائیفائیڈ کی تشخیص ہوتی ہے۔

اویسٹر بے وہ جگہ  رہی ہے جو کبھی گرمیوں میں امریکی صدر روزوویلٹ کے لیے وائٹ ہاؤس کا کردار ادا کیا کرتی تھی۔ ایسی صاف شفاف اور پرتعیش جگہ پر چھ لوگوں کو یکایک ٹائیفائیڈ ہو جانا حیرت کی بات تھی کیونکہ اس زمانے میں اور آج بھی ٹائیفائیڈ کو بھیڑ بھاڑ والے غریب و پسماندہ علاقے کی بیماری کہا جاتا ہے جہاں بنیادی سہولیات اور صاف صفائی کی کمی ہوتی ہے۔

بہر حال اس جگہ کے مالک کو وبا پھیلنے کے خدشے کے پیش نظر یہ بات ستانے لگی کہ اس کی وجہ سے ان کا سمر ہاؤس کوئی کرائے یا لیز پر نہیں لے گا اور پھر اس کے تدارک کے لیے انھوں نے صحت کے شعبے میں کام کرنے والے ایک فری لانس سینیٹری انجینئر جارج سوپر کی خدمات حاصل کی کیں۔

جارج سوپر نے بہت باریک بینی کے ساتھ ٹائیفائڈ بخار کے پھیلنے کے ذرائع کی تحقیقات کیں۔ انھوں نے گھر کے پلمبنگ سے لے کر مقامی شیل فش کی سپلائی تک ہر چیز کا معائنہ اور جانچ کی لیکن سب کے نتائج منفی آئے۔ لیکن پھر جارج سوپر نے اس کی وجہ ڈھونڈ لی۔

اس کی وجہ وہ باورچن نکلیں جو گھر میں ٹائیفائیڈ کی وباء سے کچھ ہفتے پہلے وارنز کے لیے کام کر رہی تھیں۔ سوپر نے پھر باورچن کی ملازمتوں پر تحقیق کی کہ اس سے قبل انھوں نے کہاں کہاں اور کب کب کام کیا۔

تحقیق کے دوران انھیں پتہ چلا کہ جن سات خاندانوں کے لیے انھوں نے 1900 کے بعد سے 1907 تک کھانا پکایا تھا ان کے ہاں ٹائیفائیڈ بخار کے کیسز رپورٹ ہوئے تھے اور 22 افراد میں انفیکشن ہوا تھا جس میں سے ایک لڑکی کی موت ہو گئی تھی۔

اس باورچن کا نام میری میلن تھا اور وہ آئر لینڈ سے ہجرت کرکے امریکہ پہنچی تھیں جہاں وہ گھروں میں کھانا پکانے کا کام کرتی رہیں یہاں تک کہ انھیں قید تنہائی میں ڈال دیا گیا۔

میری میلن سے ٹائیفائڈ میری بننے کی کہانی

انسائیکلوپیڈیا بریٹینکا کے مطابق میری میلن 23 ستمبر سنہ 1869 کو آئرلینڈ کے قصبے ٹائرون کے گاؤں ککزٹاؤن میں پیدا ہوئیں۔

میری میلن 1883 میں امریکہ ہجرت کر گئیں اور اس کے بعد انہوں نے گھریلو ملازمہ کے طور پر اور اکثر باورچن کے طور پر اپنی زندگی گزاری۔

یہ واضح نہیں ہے کہ وہ کب ٹائیفائیڈ پھیلانے والے بیکٹیریا (سالمونیلا ٹائفی) کی کیریئر یعنی اس کا وسیلہ بنیں۔ لیکن 1900 سے 1907 تک نیویارک شہر اور لانگ آئی لینڈ کے گھرانوں میں جہاں جہاں میلن نے گھریلو خدمات انجام دیں وہاں تقریباً دو درجن لوگ ٹائیفائیڈ بخار سے بیمار ہوئے۔

بریٹینیکا کے مطابق بیماریاں اکثر ان کے ہر گھر میں کام کرنا شروع کرنے کے فوراً بعد ہوتی تھیں لیکن جب تک کہ گھر میں اس بیماری کا سراغ لگایا جاتا اس سے قبل میلن وہاں سے جا چکی ہوتی تھیں۔

جارج سوپر کے انکشاف کے بعد ڈاکٹروں نے پایا کہ وہ کبھی خود ٹائیفائڈ کا شکار نہیں ہوئی تھیں لیکن وہ اس بیماری کے بیکٹریے کا کیریئر کس طرح تھیں یہ واضح نہیں ہو سکا۔

ڈاکٹروں نے یہ نظریہ پیش کیا کہ میلن ممکنہ طور پر کھانے پکانے یا اسے پیش کرنے کے دوران اچھی طرح سے ہاتھ نہیں دھوتی تھیں اس لیے ٹائیفائیڈ کے جراثیم ان کے ہاتھ سے گزر کر کھانے میں چلے جاتے تھے۔

لیکن یہ بھی کہا گیا کہ چونکہ کھانا پکانے کے لیے ضروری درجہ حرارت بیکٹیریا کو ہلاک کر دیتا ہے تو پھر وہ کس طرح جراثیم کو منتقل کر سکتی تھیں۔

اس کا جواب انہیں میلن کے خاص میٹھے پکوان میں سے ایک میں ملا۔ اور یہ پکوان ایک قسم کی آئس کریم تھی جس میں وہ کچے آڑو کو کاٹ کر ڈالتی تھیں اور پھر اسے فرج میں جما دیتی تھیں۔

سوپر نے لکھا کہ ’مجھے لگتا ہے کہ باورچی کے لیے اس سے بہتر کوئی طریقہ نہیں ہو سکتا تھا وہ اپنے ہاتھوں سے جرثوموں کو منتقل کرے اور اس سے کوئی خاندان متاثر ہو۔‘

جارج سوپر کی تفتیش کی بنیاد پر نیو یارک سٹی محکمہ صحت نے 1907 میں میلن کو اپنی تحویل میں لے لیا اور انہیں برونکس کے ساحل سے دور نارتھ بردرز جزیرے پر 16 ایکڑ پر پھیلے ایک بنگلے کے اندر جبری قید میں رکھا گیا جہاں ان کے ساتھ صرف ایک شکاری کتّا تھا۔

میلن نے اس وقت ایک اخبار کو بتایا کہ ’مجھے زندگی میں کبھی ٹائیفائیڈ نہیں ہوا اور میں ہمیشہ صحت مند رہی ہوں۔ کیوں مجھے کسی کوڑھی کی طرح جلاوطن کیا گیا ہے اور صرف ایک کتّے کے ساتھ قید تنہائی میں رہنے پر مجبور کیا گیا ہے؟‘

ایک پرائیویٹ لیبارٹری کے منفی ٹیسٹ کے نتائج کے ساتھ میلن نے 1909 میں محکمہ صحت پر اپنی آزادی کے لیے مقدمہ دائر کیا لیکن نیویارک کی سپریم کورٹ نے ان کی درخواست کو مسترد کر دیا۔

اس وقت لوگوں میں یہ تجسس پایا گیا کہ آخر میلن کے پاس وکیل کی خدمات حاصل کرنے اور قانونی بل ادا کرنے کے لیے پیسے کہاں سے آئے؟ تو یہ بات سامنے آئی کہ اخبار کے ایک بڑے تاجر ولیم رینڈولف ہرسٹ نے ایسا اس لیے کیا کیونکہ ان کے اخبار کے پڑھنے والوں کی اس قسم کی خبروں میں کافی دلچسپی تھی۔

بہر حال 1910 میں نئے ہیلتھ کمشنر ارنسٹ لیڈرل نے میلن کو رہا کرنے پر رضامندی ظاہر کی لیکن اس کے ساتھ یہ شرط رکھی کہ وہ دوبارہ کبھی باورچی کے طور پر کام نہیں کریں گی۔

لیکن انھوں نے اپنا عہد توڑ دیا اور اس کا پتہ اس وقت چلا جب 1915 میں مین ہٹن کے میٹرنیٹی ہسپتال میں 25 ملازمین بیمار ہو گئے اور ان میں سے دو کی موت ہو گئی۔

اس وبا کے پھیلنے کی جگہ ہسپتال کا باورچی خانہ تھا اور وہاں کام کرنے والی خاتون میری براؤن تھیں۔ یعنی میری میلن نے اپنا نام بدل لیا تھا۔ اس کے بعد ہسپتال کے عملے نے انھیں ’ٹائیفائڈ میری‘ کا نام دے دیا تھا۔

محکمہ صحت نے رہائی کے بعد میلن کا سراغ کھو دیا تھا لیکن اس دوران وہ ہوٹلوں، ریستورانوں اور اداروں میں کھانا پکاتی رہیں۔ مین ہٹن کے ہسپتال میں وبا پھیلنے کے بعد میری میلن کو دوبارہ گرفتار کر لیا گيا اور انھیں اسی جزیرے پر قید تنہائی میں بھیج دیا گیا جہاں اس سے پہلے انھیں رکھا گیا تھا۔

کرسٹوفر کیلن اپنے ایک مضمون میں لکھتے ہیں کہ دوسری بار پکڑے جانے کے بعد میلن نے اپنی زندگی کے آخری 23 سال اس جزیرے پر جبری تنہائی میں گزارے۔ اور اگر ان میں نارتھ برادر آئی لینڈ پر گزارے پہلے کے تین سال جوڑ دیے جائیں تو انھوں نے 26 سال جبری تنہائی میں گزارے۔

ان کا کہنا ہے کہ اگر چہ ہزاروں نہیں تو سینکڑوں ایسے لوگ ہیں جو شناخت کیے گئے بغیر علامات والے کیریئرز میں ہیں اور نیویارک کے فٹ پاتھوں پر آزادانہ طور پر گھومتے اور کام کرتے گزرے ہیں لیکن ٹائیفائیڈ میری واحد شخص ہیں جنھیں جلاوطنی کی زندگی گزارنی پڑی کیونکہ رائے عامہ باورچی خانے سے باہر نہ رہنے کی وجہ سے ان کے سخت خلاف ہو گئی تھی۔

وہ 11 نومبر 1938 یعنی اپنی موت تک صرف اپنے لیے کھانا پکاتی رہیں حالانکہ وہ نیویارک کی تاریخ کی ٹائیفائیڈ کی سب سے مہلک کریئر نہیں تھیں کیونکہ ان کی وجہ سے صرف 51 لوگ بیمار پڑے تھے جن میں سے تین کی موت ہو گئی تھی جبکہ فوڈ ورکر ٹونی لابیلا ٹائیفائڈ کی دو وبا کے پھیلنے کی وجہ بنے تھے اور ان کی وجہ سے ایک سو سے زیادہ لوگ بیمار پڑے تھے جن میں سے پانچ کی موت ہو گئی تھی۔

جوڈتھ والزر لیوتھ نے ان پر ایک کتاب تصنیف کی ہے۔ وہ اپنی کتاب ’ٹائیفائڈ میری: کیپٹیو ٹو دی پبلکز ہیلتھ‘ میں لکھتی ہیں کہ ’انہوں نے کبھی بھی اس بیماری کا شکار ہونے سے انکار کیا تھا، اور یہ امکان ہے کہ انہیں یہ معلوم ہی نہ ہو کہ انہیں ایسی کوئي بیماری بھی تھی، صرف انہیں ہلکے فلو جیسی بیماری ہوئی تھی۔‘

ایک اخبار نے لکھا کہ ’میڈیکل ریکارڈز میں یہ اپنے آپ میں نادر ہے اور ایسی دوسری مثال نہیں ملتی کہ کسی خاتون کو کبھی ٹائیفائیڈ بخار نہیں ہوا ہو اور وہ جراثیم کی ایک فیکٹری ثابت ہو۔‘