غزل میں ’ماں کو محبوب‘ بنانے والے نامور شاعر منور رانا چل بسے

کسی کو گھر ملا حصے میں یا کوئی دُکاں آئی

میں گھر میں سب سے چھوٹا تھا مرے حصّے میں ماں آئی

غزل میں ماں کی ہستی سے محبت اور عقیدت کا اظہار کرنے والے اُردو کے نامور شاعر منور رانا دل کا دورہ پڑنے کے باعث 71 برس کی عمر میں انتقال کر گئے ہیں۔

انڈیا ٹو ڈے کے مطابق منور رانا کئی ماہ سے علیل تھے اور لکھنو کے پی جی آئی ہسپتال میں زیر علاج تھے۔ وہ گردے اور دل کے امراض میں مبتلا تھے۔

منور رانا کی صاحبزادی سمیہ رانا نے خبر رساں ایجنسی پی ٹی آئی کو بتایا کہ ان کے والد کا اتوار کی رات ہسپتال میں انتقال ہو گیا تھا اور انہیں پیر کو سپرد خاک کیا جائے گا۔

منور رانا کے بیٹے تبریز رانا نے پی ٹی آئی کو بتایا کہ وہ بیماری کی وجہ سے 14 سے 15 دن تک ہسپتال میں داخل رہے۔ انہیں پہلے لکھنؤ کے میڈانتا اور پھر ایس جی پی جی آئی میں داخل کرایا گیا جہاں انہوں نے رات 11 بجے کے قریب آخری سانس لی۔‘

نامور شاعر کے پسماندگان میں اہلیہ، چار بیٹیاں اور ایک بیٹا شامل ہے۔