سعودی خاتون ڈیزائنر کے ملبوسات میں العلا کے مناظر اور تاریخی نقوش کی جھلک

سعودی خاتون ڈیزائنر وجدان الفقیری نے قدیم تاریخی علاقے العلا کے نقوش اور وہاں کے قدرتی حسن سے متاثر ہو کر اپنے تیار کردہ ملبوسات پر علاقے کے مقامات کی کشیدہ کاری شروع کردی۔

عاجل نیوز کے مطابق انہوں نے بتایا کہ وہ دستکاری کی ہمیشہ سے شوقین رہی ہیں۔ اسی وجہ سے علاقے کے روایتی ملبوسات کے خوبصورت ڈئزائن تیار کیے، جن پر العلا کے ان مقامات کی عکاسی کی جو عہدِ رفتہ کی ہزاروں داستانیں اپنے اندر چھپائے ہوئے ہیں۔

وجدان الفقیری نے اپنے پروجیکٹ کا نام ’شقیلہ‘ رکھا، جو العلا کے نباتیوں کے بادشاہ الحارث چہارم (اریتاس چہارم) کی بیٹی تھی جو اس دور میں العلا میں آباد تھے۔

سعودی ڈیزائنر کا کہنا تھا کہ انہوں نے ایسے مناظر کی کشیدہ کاری کی جو العلا کی پہچان ہیں جن میں چٹانوں پر کنندہ نقوش کے علاوہ علاقے کے کھجوروں کے باغات وغیرہ شامل ہیں۔

العلا میں آنے والے سیاحوں کے لیے وجدان نے اپنے گھر کے ایک حصہ میں اپنے فن پارے رکھے ہیں، جنہیں سیاح بڑے شوق سے دیکھتے ہیں اور اس کے فن کو سراہتے ہیں۔

انہوں نے مزید کہا کہ ’میری خواہش ہے جو بھی میرے تیار کردہ ڈیزائنوں کو دیکھے اسے ان میں علاقے کی خوبصورتی نظر آئے۔‘ وجدان نے اپنی تیار کردہ اشیا کو متعدد بار نمائشوں میں بھی رکھا ہے۔