ایئر وائس مارشل اورنگزیب احمد کی ’رفال ہنٹر‘ سے ’قومی کرش‘ بننے کی داستان

’میں ہوں ایئر وائس مارشل اور میں وہیں سے شروع کروں گا جہاں بات ختم کی تھی۔۔۔ پاکستان فضائیہ 6، انڈین فضائیہ 0‘ یہ تھے وہ الفاظ جنہوں نے پاکستان میں سوشل میڈیا پر رات گئے ٹرینڈ بنا دیا۔

پاکستان ایئر فورس کے وائس مارشل اورنگزیب احمد نے اتوار کی شب پریس بریفنگ کے آغاز میں یہ الفاظ ایسے کہے کہ پاکستان میں انٹرنیٹ پر ہر جانب انہی کی گفتگو کے کلپس، میمز، اور تعریفی پوسٹس دکھائی دے رہی ہیں۔ 

جنگی حالات میں پاکستانی فضائیہ کی کارکردگی پر تفصیلی بریفنگ دیتے ہوئے ان کی پراعتماد اور جذبات سے بھرپور اندازِ گفتگو نے انہیں عوامی ہیرو بنا دیا ہے۔

6 اور 7 مئی کی درمیانی شب پاک فضائیہ اور انڈین ایئر فورس کے درمیان لائن آف کنٹرول کے قریب ہونے والی فضائی جھڑپ کے بعد ایک بریفنگ میں بتایا گیا کہ پاکستان نے انڈین فضائیہ کے پانچ جنگی طیارے مار گرائے، جن میں تین رفال، ایک ایس یو-30 اور ایک میگ-29 شامل ہیں، جبکہ پاکستان کا کوئی طیارہ تباہ نہیں ہوا۔

وائس مارشل اورنگزیب احمد نے ثبوت کے طور پر انٹرسیپٹ کی گئی انڈین پائلٹس کی آڈیو کلپس بھی پریس کے سامنے رکھیں۔ ان کا کہنا تھا کہ پاکستان ایئر فورس نے نہ صرف پیشہ ورانہ مہارت کا مظاہرہ کیا بلکہ ہر سطح پر انڈیا کی جارحیت کا موثر جواب دیا۔

تاہم انڈیا اور پاکستان کی جنگ بندی کے بعد دوسری بریفنگ میں اورنگزیب احمد نے آغاز ہی یہاں سے کیا کہ اب پاک فضائیہ کا سکور 6 ہو چکا ہے۔ 

ان کی بریفنگ کے بعد نہ صرف سوشل میڈیا پر #PAF6IAF0 ٹرینڈ کرنے لگا بلکہ عوام نے ان کی شخصیت، انداز بیان اور دفاعی صلاحیتوں پر بھرپور اعتماد کا اظہار کیا۔ ٹوئٹر، فیس بک اور انسٹاگرام پر ہزاروں صارفین نے ان کے کلپس شیئر کیے اور انہیں ’ہیرو آف دی نیشن‘ قرار دیا۔

لیکن بات ہیرو تک محدود نہیں، کیونکہ اورنگزیب احمد کو ’پاکستان کا قومی کرش بھی کہا جا رہا ہے‘ اور یہ پوسٹس زیادہ تر پاکستانی خواتین کی جانب سے کی گئی ہیں۔

انڈیا اور پاکستان کے درمیان جب حالات کشیدہ ہونا شروع ہوئے تب بھی دیکھا گیا کہ پاکستانی انٹرنیٹ صارفین نے سوشل میڈیا پر میمز کا سہارا لیا اور جنگ بندی کے بعد بھی یہ سلسلہ رکا نہیں ہے۔ 

ایک صارف نے لکھا ’ڈائناسورز نے ایک بار اورنگزیب کو غلط طریقے سے دیکھا، آگے آپ جانتے ہیں پھر ان کے ساتھ کیا ہوا۔‘

شاہ ویز نامی صارف نے انہیں ’رفال ہنٹر‘ کہہ کر پکارا۔ 

فیضان کہتے ہیں ’جب اورنگزیب کوئی اکاؤنٹ بناتے ہیں تو ٹرمز اینڈ کنڈیشنز ان سے متفق ہوتی ہیں۔‘

ایک اور پوسٹ میں لکھا گیا ’اورنگزیب احمد نے ایک مرتبہ نوکیا 3310 توڑ دیا تھا۔‘ 

موسیٰ ورک نے لکھا ’ایک بار اورنگزیب کالج سے لیٹ ہوگئے تھے، باقی تمام طلبا کو جلدی آنے پر فائن کر دیا گیا۔‘

موسٰی نے ایک اور پوسٹ میں لکھا ’جب اورنگزیب گھڑی نہیں پہنتے تو وہ خود طے کرتے ہیں کیا وقت ہوا ہے۔‘

یہ ان تمام میمز اور تعریفی پوسٹ میں سے چند تھیں جو اس وقت سوشل میڈیا پر وائرل ہیں، دوسری جانب اورنگزیب احمد کا انڈین رفال طیارے پر دیا گیا بیان بھی توجہ کا مرکز بنا ہوا ہے۔ 

پریس بریفنگ کے دوران جب رفال طیاروں سے متعلق سوال کیا گیا تو اورنگزیب احمد نے کہا کہ ’رفال ایک طاقتور طیارہ ہے اگر اس کو سہی سے استعمال کیا جائے۔‘

ایک اور ویڈیو میں انہیں سنا جا سکتا ہے جس میں وہ کہہ رہے ہیں ’بات ساری طیاروں کے استعمال کی ہوتی ہے۔ اصل چیز ٹریننگ ہوتی ہے، پائلٹس کی ذہنیت ہوتی ہے۔ پاکستان ایئر فورس دوسرے ممالک کو بھی ٹریننگ دیتی ہے۔‘

میڈیا کو بریفنگ کے دوران ایک اور کلپ میں ایئر وائس مارشل کو کہتے سنا جا سکتا ہے جس میں وہ انڈین پائلٹس کو کہہ رہے ہیں کہ ان کی سیکھنے کی رفتار کم ہے، امید ہے کہ وہ آئندہ ایسا کرنے کا نہیں سوچیں گے۔ 

ایک صارف نے تو اورنگزیب احمد کا مبینہ ایکس اکاؤنٹ بھی تلاش کر کے سکرین شاٹ شیئر کیا۔