عازمین ایام حج کے دوران اپنی صحت کا خیال کیسے رکھیں

سعودی وزارت  صحت نے عازمین کو ہدایت کی ہے کہ ایام حج میں اپنی صحت کا خاص خیال رکھیں تاکہ زندگی کا اہم ترین فریضہ باسانی ادا کرسکیں۔

 وزارت نے اپنے ایکس اکاونٹ پر جاری ہدایات میں کہا ہے مناسک حج کی ادائیگی کے دوران عازمین پانی کا استعمال زیادہ سے زیادہ کریں، ہاتھوں کو دھوئیں اور ازدحام کے مقامات پر ماسک کا خاص خیال رکھیں۔

دیگر احتیاطی تدابیر کے حوالے سے وزارت حج کا کہنا تھا اپنی ذاتی استعمال کے آلات اور اشیا کسی اور کو استعمال کرنے نہ دیں۔

کھلی ہوئی اشیائے خورونوش اورغیرمعیاری کھانوں سے اجتناب برتیں اور صحت مند غذائیں تناول کریں۔

اس سے قبل سعودی وزارت صحت نے عازمین حج کو طبی آگاہی کی فراہمی کے لیے اردو سمیت متعدد زبانوں میں ’ ہیلتھ کٹ‘ جاری کی تھی۔

اس میں موسمی حالات کے پیش نذر احتیاطی تدابیر اختیار کرنے کے طریقوں سے آگاہ کیا گیا۔

 ہدایات میں کہا گیا تھا عازمین ایام حج میں براہ راست دھوپ سے بچیں، خیموں سے باہر نکلتے وقت چھتری کا استعمال لازمی طور پر کریں۔ جسم میں پانی کی کمی نہ ہونے دیں جس کے لیے پانی کا استعمال مناسب مقدار میں کریں۔