مکہ مکرمہ : خاتون عازم حج کی آنکھ کا بروقت آپریشن، بینائی بحال

مکہ مکرمہ میں مصری عازم حج خاتون کو بروقت طبی امداد کی فراہمی سے ان کی بینائی ختم ہونے سے بچ گئی۔ مکہ صحت مرکز میں موجود ماہر امراض چشم نے فوری آپریشن کیا جو کامیاب رہا اوربینائی بحال ہو گئی۔

سعودی خبررساں ایجنسی ’ایس پی اے‘ کے مطابق وزارت صحت کی جانب مکہ مکرمہ اور مدینہ منورہ میں عازمین حج کو فوری طبی خدمات کی فراہمی کا خصوصی اہتمام کیا ہے جس کے تحت دونوں مقدس شہروں میں ہسپتال اور طبی مراکز قائم کیے ہیں علاوہ ازیں فرسٹ ایڈ یونٹس بھی شہر کے مختلف مقامات پر متعین کیے گئے ہیں۔

مکہ طبی مرکز میں ماہر امراض چشم ڈاکٹر اسامہ سعید العمری نے بتایا کہ مصری عازم حج خاتون کو مرکز میں لایا گیا جن کی آنکھوں میں موتیہ بگڑنے کی وجہ سے انکی بینائی ختم ہونے کے قریب تھی۔

ڈاکٹر اسامہ کا مزید کہنا تھا کہ عازم حج خاتون کا تفصیلی طبی معائنہ کیا اور معالجین کی ٹیم نے یہ فیصلہ کیا کہ آنکھ کا فوری آپریشن کرنا ضروری ہے بصورت دیگر بینائی مکمل ختم ہو سکتی ہے۔

ماہرین کی ٹیم نے آپریشن سے قبل خاتون کے طبی ٹیسٹ کیے بعدازاں موتیے کا آپریشن کرنے کے بعد لینس کی پیوند کاری کا عمل مکمل کرلیا جو کامیاب رہا ۔

ڈاکٹر اسامہ کا کہنا تھا کہ آپریشن کے کچھ دیر بعد ہی مریضہ کی حالت بہترہونے پر انہیں ہسپتال سے رخصت کردیا گیا۔ بروقت طبی امداد میسرآنے سے انکی بینائی مکمل طورپر بحال ہوگئی۔