تبوک میونسپلٹی نے نگرانی مہم تیز کر دی، ایک ہزار 253 دورے

سعودی عرب میں تبوک میونسپلٹی نے کھانے پینے کی اشیا اور تجارتی مراکز کو طے شدہ اصول و ضوابط کے تحت بنانے کی ہدایت پرعمل درآمد کی نگرانی کے لیے ایک مہم کا آغاز کیا ہے۔

عرب نیوز کے مطابق میونسپلٹی کے نائب میئرعوید العطوی نے جو لائسنس کے اجرا اور ضابطوں پر عمل درآمد کے ذمہ دار ہیں، بتایا’ نگرانی مہم کے سلسلے میں ایک ہزار253 دورے کیے گئے جن کے نتیجے میں 184 کمرشل مراکز کو تنبیہ جاری کی گئی جبکہ دیگر 7 کو زیادہ سنگین خلاف ورزیوں کی وجہ سے بند کر دیا گیا۔

اس کے علاوہ46 کلوگرام خراب اور کچا میٹریل اور 54 کلوگرام مضر صحت گوشت بھی ضبط کر لیا گیا۔

انہوں نے بتایا کہ’ ضابطوں کی سنگین خلاف ورزی یہ تھی کہ تجارتی مراکز میں کارکنوں کے پاس ضروری ہیلتھ سرٹیفیکیٹ نہیں تھے۔‘

انھوں نے زور دیا کہ’ یہ کوششیں محفوظ اور صحت مند خوراک اور خدمات فراہم کرنے کے لیے ہیں۔ ان کا ایک مقصد یہ بھی ہے کہ ان کاموں کی جگہیں صحت کے منظور شدہ معیار پر سختی سے کاربند ہوں۔‘