انٹرنیشنل لائسنس پرمملکت میں گاڑی چلانے کے ضوابط ؟

سعودی ٹریفک پولیس نے عارضی ویزوں پر مملکت آنے والے زائرین کو ہدایت کی ہے کہ ڈرائیونگ کے حوالے سے ٹریفک قوانین پر سختی سے پابندی کریں۔

سبق نیوز کے مطابق ادارہ ٹریفک پولیس کا کہنا ہے کہ خلیجی ممالک کے علاوہ دیگر ممالک سے آنے والے وزٹرز کو چاہئے کہ وہ مملکت آنے سے قبل اپنے ڈرائیونگ لائسنس کا مستند ادارے سے عربی میں ترجمہ کرائیں۔

غیر ملکی یا انٹرنیشنل ڈرائیونگ لائسنس مملکت آنے کے وقت ایک برس سے زیادہ پرانا نہ ہو ۔ خلیجی ممالک کے باشندے اس سے مستثنی ہوں گے۔

ٹریفک پولیس کا مزید کہنا ہے کہ خلیجی ممالک سے جاری ہونے والے ڈرائیونگ لائسنس کو مملکت کے لائسنس سے تبدیل کرانا ضروری نہیں ہوگا جب تک لائسنس کارآمد ہے اس پرسعودی عرب میں ڈرائیونگ کی جاسکتی ہے۔