دبئی میں نئے ڈرائیونگ لائسنس کے اجرا کے لیے فیسوں کا اعلان

دبئی روڈز اینڈ ٹرانسپورٹ اتھارٹی (آر ٹی اے) نے نئے ڈرائیونگ لائسنس کے اجرا اور لرننگ پرمٹ سے متعلق نئی فیسوں کا اعلان کیا ہے۔

الامارات الیوم کے مطابق موٹر سائیکل، لائٹ وہیکل اور لائٹ آٹومیٹک گاڑیوں کے لیے لرننگ پرمٹ کی فیس 100 درھم مقرر کی گئی ہے جبکہ لائٹ اور ہیوی بسوں، مکینیکل مشینری اور ہیوی گاڑیوں کے لیے فیس 200 درھم ہو گی۔

 محکمہ ٹریفک میں فائل کھولنے پر 200 درھم، سیف ڈرائیونگ گائیڈ فیس 50 درھم اور آئی ٹیسٹ کے لیے کم از کم 140 اور زیادہ سے زیادہ 180 درھم فیس رکھی گئی ہے۔ اس کے علاوہ ہر درخواست گزار کو 20 درھم انوویشن اور نالج فیس بھی ادا کرنا ہو گی۔

  ڈرائیونگ لائسنس کے اجرا کے لیے 21 سال سے کم عمر افراد سے 100 درھم جبکہ 21 سال یا اس سے زیادہ عمر کے افراد سے 300 درھم فیس وصول کی جائے گی جس میں 20 درھم انوویشن فیس شامل ہے۔

روڈز ٹرانسپورٹ اتھارٹی کا کہنا ہے کہ اگر کوئی درخواست گزار ڈرائیونگ لائسنس کی کیٹگری کو مینول سے آٹو میٹک یا آٹو میٹک سے مینول میں تبدیل کرنا چاہے تو 200 درھم اضافی فیس اور 20 درھم انوویشن چارجز ادا کرنا ہوں گے۔

 اگر کسی شخص نے روڈ ٹیسٹ پاس کرنے کے باوجود ایک سال تک لائسنس حاصل نہیں کیا تو اسے دوبارہ ٹیسٹ پاس کرنا ہوگا جس میں 200 درھم لرننگ فائل فیس، 100 درھم لرننگ فارم، 50 درھم سیف ڈرائیونگ گائیڈ، 300 درھم لائسنس فیس، 200 درھم آر ٹی اے روڈ ٹیسٹ فیس اور 20 درھم انوویشن فیس شامل ہے۔

 لائسنس کی منسوخی یا معطلی کی صورت میں دوبارہ امتحان دینے کے لیے 200 درھم فیس برائے آر ٹی اے ٹیسٹ، 200 درھم لرننگ فائل اوپننگ فیس، 100 درھم فارم فیس، 3 ہزار درھم ری ہیبلیٹیشن فیس اور آئی ٹیسٹ کی فیس 140 سے 180 درھم مقرر کی گئی ہے۔