برطانیہ میں سعودی طالبعلم کا قتل، دو مشتبہ افراد سے تحقیقات

برطانیہ کے شہر کیمبرج کے جنوب میں واقع مل پارک میں ایک سعودی طالبعلم کو چاقو کے وار کرکے قتل کردیا گیا۔

الاخباریہ کے مطابق برطانوی پولیس نے واقعے میں ملوث ہونے کے شبے میں دو افراد کو گرفتار کیا ہے، ان سے تفتیش کی جا رہی ہے۔

 کیمبرج شائر پولیس کے بیان میں کہا گیا کہ 21 سالہ شخص کو قتل کے شبے جبکہ 50 سالہ شخص کو مجرم کی مدد کرنے کے شبے میں حراست میں لیا گیا۔ دونوں تھورپ ووڈ پولیس سٹیشن میں ہیں۔

 کیمبرج پولیس کو گزشتہ جمعے رات 11 بجکر 27 منٹ پرتشدد کی اطلاع کے بعد بلایا گیا ایک 20 سالہ نوجوان زخمی حالت میں پایا گیا، اسے سنیچر کی صبح مردہ قرار دے دیا گیا۔

اگرچہ برطانوی حکام نے باضابطہ طور پر مقتول کی شناخت ظاہر نہیں کی تاہم اتوار کو الاخباریہ اور العربیہ کی رپورٹ میں بتایا گیا کہ محمد القاسم سعودی شہری اور ای ایف انٹرنیشنل لینگویج کیمپس کا طالبعلم تھا جو ایک نجی سکول ہے۔

سکول انتظامیہ نے طالبعلم کی موت پر گہرے دکھ کا اظہار کیا اور کہا کہ’ ہم پولیس کے ساتھ مل کر کام کررہے ہیں جو اس واقعہ کی تحقیقات کر رہی ہے۔‘

’ہم اس المناک واقعہ سے متاثرہ تمام طلبا اور عملے کو مدد فراہم کر رہے ہیں، ہم نے کونسلنگ سیشن کا اہتمام کیا ہے۔ تمام طلبا کی سیفٹی اور سلامتی ہماری اولین ترجیح ہے۔‘