چین اور انڈیا کا سیاحتی ویزے کھولنے، پروازیں اور سرحدی تجارت شروع کرنے پر اتفاق

چین اور انڈیا نے دوبارہ براہِ راست پروازیں شروع کرنے کا اعلان کیا ہے۔
فرانسیسی خبر رساں ایجنسی اے ایف پی کے مطابق دونوں ممالک کے سرکاری میڈیا نے بدھ کو یہ خبر نشر اور شائع کی جس کے بعد چینی وزیر خارجہ وانگ ژی انڈیا کا دورہ مکمل کرنے کے بعد پاکستان پہنچ گئے ہیں۔
وانگ ژی کے دورے کے دوران چین اور انڈیا نے اپنے سرحدی تنزعے پر بات چیت کو آگے بڑھانے، سیاحتی ویزے دوبارہ شروع کرنے اور تجارت کو فروغ دینے پر بھی اتفاق کیا۔

شنہوا نے بدھ کو ایک رپورٹ میں بتایا کہ انڈیا کے قومی سلامتی کے مشیر اجیت دوول کے ساتھ سرحدی معاملے پر بات چیت میں فریقین نے ’سرحدوں کی حد بندی پر بات چیت کو آگے بڑھانے‘ پر اتفاق کیا اور تین مقامات پر سرحدی تجارتی منڈیاں دوبارہ کھولنے کا عزم کیا۔
دونوں ممالک کے درمیان 2020 میں شدید سرحدی جھڑپ کے بعد تعلقات کشیدہ ہو گئے تھے، تاہم نریندر مودی نے اکتوبر 2024 میں روس میں منعقد ہونے والے ایک اجلاس کے دوران چینی صدر شی جن پنگ سے ملاقات کی تھی جو دونوں رہنماؤں کے درمیان گذشتہ پانچ برسوں کے دوران ہونے والی پہلی ملاقات تھی۔
انڈین وزیراعظم نریندر مودی اگست کے آخر میں چین کا دورہ کریں گے۔ یہ ان کا 2018 کے بعد چین کا پہلا دورہ ہو گا۔
نریندر مودی کے دورہ چین کے بارے میں اعلان انڈیا کے قومی سلامتی کے مشیر اجیت دوول نے منگل کو چین کے وزیر خارجہ وانگ ژی کے ساتھ نئی دہلی میں ہونے والی ملاقات کے دوران کیا۔
اجیت دوول نے بتایا کہ نریندر مودی 31 اگست کو تیانجن میں ہونے والے شنگھائی تعاون تنظیم (ایس سی او) کے سربراہی اجلاس میں شرکت کریں گے۔
چینی وزارت خارجہ کے ترجمان نے منگل کو ایک نیوز بریفنگ میں بتایا کہ ’انڈیا اور پاکستان دونوں چین کے اہم پڑوسی ہیں۔‘
’ہم دونوں ممالک کے ساتھ دوستانہ تعاون کو آگے بڑھانے کے لیے تیار ہیں، اور امید کرتے ہیں کہ اِن کے درمیان اختلافات اچھے انداز میں ختم ہو سکیں گے۔‘